തിരുവനന്തപുരം : കോവിഡ് വാക്സിന്റെ രണ്ടാം ഡോസ് വൈകുന്നതില് ആശങ്ക വേണ്ടെന്ന് മുഖ്യമന്ത്രി പിണറായി വിജയന്. കേരളത്തില് ഭൂരിപക്ഷം പേര്ക്കും കൊവിഷീല്ഡ് വാക്സിനാണ് നല്കിയിരിക്കുന്നത്. ആ വാക്സിന്റെ രണ്ടാമത്തെ ഡോസ് 12 ആഴ്ച വരെ വൈകിയാലും കുഴപ്പമില്ലെന്നും മുഖ്യമന്ത്രി പറഞ്ഞു.
ആദ്യത്തെ ഡോസ് വാക്സിന് എടുത്തുവര് രണ്ടാമത്തെ ഡോസ് കിട്ടാന് തടസമുണ്ടാകുമോ എന്ന് ആശങ്കപ്പെടുന്നുണ്ട്. വാക്സിനേഷന് കേന്ദ്രങ്ങളിലെ തിരക്കിന് അതും കാരണമാണ്. രണ്ടാമത്തെ ഡോസ് 12 ആഴ്ച വരെ വൈകുന്നതാണ് നല്ലതെന്നെന്നാണ് പഠനങ്ങള് പറയുന്നത്. മറിച്ചുള്ള ആശങ്കകള് അടിസ്ഥാന രഹിതമാണ്.
ഒരോ ദിവസവും രോഗബാധിതരുടെ എണ്ണം വലിയ തോതില് കൂടുകയാണെന്നും വാക്സിനേഷന് കേന്ദ്രങ്ങളില് ചിലയിടത്ത് ആള്ക്കൂട്ടമുണ്ടാവുന്നുണ്ടെന്നും മുഖ്യമന്ത്രി ചൂണ്ടിക്കാട്ടി. വാക്സിനേഷനുള്ള ഓണ്ലൈന് രജിസ്ട്രേഷനില് ആശയക്കുഴപ്പമില്ല. മുന്കൂട്ടി രജിസ്ട്രര് ചെയ്തവര്ക്ക് വാക്സിന് എടുക്കാനാവൂ. നിലവില് സ്പോട്ട് രജിസ്ട്രേഷന് എടുത്തവര്ക്ക് വാക്സിന് നല്കാന് ധാരണയായിട്ടുണ്ട്. രണ്ടാമത്തെ ഡോസ് എടുക്കാനുള്ളവര്ക്കും ഓണ്ലൈന് രജിസ്ട്രേഷന് നിര്ബന്ധമാണെന്നും പിണറായി പറഞ്ഞു.
