കോഴിക്കോട്: പോലീസ് നിയമഭേദഗതിയില് മുഖ്യമന്ത്രി പിണറായി വിജയനെതിരെ രൂക്ഷ വിമര്ശനവുമായി കോണ്ഗ്രസ് നേതാവ് വി.ടി. ബല്റാം എം.എല്.എ. ഉത്തരകൊറിയന് സ്വേച്ഛാധിപതി കിം ജോങ് ഉന്നിന്റെ ചിത്രം പോസ്റ്റ് ചെയ്തുകൊണ്ടാണ് ബല്റാം ഫേസ്ബുക്കിലൂടെ വിമര്ശിച്ചത്.
‘പോലീസ് ആക്റ്റിലെ 118 (A) എന്ന ഭേദഗതി കരിനിയമം നിയമസഭയില് അവതരിപ്പിക്കുക പോലും ചെയ്യാതെ ഓര്ഡിനന്സ് വഴി അടിച്ചേല്പ്പിച്ചതിലൂടെ പിണറായി വിജയന് എന്ന കമ്മ്യൂണിസ്റ്റ് സ്വേച്ഛാധിപതി ശുദ്ധ തോന്ന്യാസമാണ് കാണിച്ചിരിക്കുന്നത് എന്ന് ഞാനോ നിങ്ങളോ ഈ മാധ്യമത്തിലൂടെ അഭിപ്രായപ്പെട്ടാല് അത് മഹാനായ അദ്ദേഹത്തിന്റെ ഇതിഹാസ തുല്യമായ റപ്യൂട്ടേഷന് ഹാനി വരുത്തിയ മഹാപരാധമാണ് എന്ന് പറഞ്ഞ് നമ്മളെയൊക്കെ പിണറായിപ്പോലീസ് പിടിച്ച് 5 വര്ഷം തടവിനും 10,000 രൂപ പിഴക്കും ശിക്ഷിക്കുമോ?’ -ബല്റാം ചോദിച്ചു.
വിവാദ നിയമത്തിലെ ശിക്ഷാവ്യവസ്ഥയും അദ്ദേഹം എടുത്തുപറയുന്നു. വ്യക്തികള്ക്ക് അപമാനകരമായ രീതിയില് ഏതെങ്കിലും കാര്യങ്ങള് പ്രചരിപ്പിച്ചാല് അഞ്ച് വര്ഷം വരെ തടവ് ശിക്ഷയും പിഴയും ലഭിക്കും വിധമാണ് കേരള സര്ക്കാര് പോലീസ് ആക്ട് ഭേദഗതി ചെയ്തത്. ചട്ട ഭേദഗതിയില് ഗവര്ണര് ആരിഫ് മുഹമ്മദ് ഖാന് ഒപ്പിട്ടതോടെ നിയമം പ്രാബല്യത്തിലായി. ഇതുസംബന്ധിച്ച വിജ്ഞാപനവും പുറത്തിറങ്ങി.
