ഇടുക്കി : വിവാഹ വാഗ്ദാനം നല്കി വഞ്ചിച്ചതിനെ തുടര്ന്ന് യുവതി വീട്ടില് ജീവനൊടുക്കിയ സംഭവത്തില് സിവില് പോലീസ് ഓഫീസറെ സര്വീസില് നിന്ന് പിരിച്ചുവിട്ടു. ശാന്തമ്പാറ സ്റ്റേഷനിലെ സിപിഒ ആയിരുന്ന കൊന്നത്തടി സ്വദേശി ശ്യാംകുമാറിനെ (32)യാണ് പിരിച്ചുവിട്ടത്. ജില്ലാ പോലീസ് മേധാവിയുടെ നിര്ദ്ദേശപ്രകാരം ഡിസിആര്ബി ഡിവൈഎസ്പി വീണ്ടും നടത്തിയ അന്വേഷണത്തെ തുടര്ന്നാണ് ശ്യാമിനെ സര്വീസില് നിന്ന് പിരിച്ചുവിട്ടത്.
മൂന്നാര് നല്ലതണ്ണി സ്വദേശിയായ ഷീബ എയ്ഞ്ചല് റാണി (27) ജീവനൊടുക്കിയ സംഭവത്തിലാണ് നടപടി. കഴിഞ്ഞ ജനുവരി ഒന്നിനാണ് വീട്ടിനുള്ളില് ഷീബ എയ്ഞ്ചല് റാണിയെ തൂങ്ങിമരിച്ച നിലയില് കണ്ടെത്തിയത്. യുവതിയുടെയും ശ്യാമിന്റെയും മൊബൈല് ഫോണുകളില് ഇരുവരും തമ്മിലുള്ള ബന്ധം തെളിയിക്കുന്ന ദൃശ്യങ്ങള് ഉണ്ടായിരുന്നു. മൂന്നാര് സോത്തുപ്പാറ സര്ക്കാര് സ്കൂളില് വനിതാ കൗണ്സിലറായിരുന്നു ഷീബ. ശ്യാംകുമാറിനെതിരെ കേസെടുക്കുമെന്നാണ് സൂചന. ജില്ലാ പോലീസ് മേധാവി ആര് കറുപ്പസ്വാമിയാണ് ശ്യാംകുമാറിനെ സര്വീസില് നിന്ന് പുറത്താക്കിയത്.
ഡിസംബര് 31നാണ് മൂന്നാര് സ്വദേശി ഷീബ എയ്ഞ്ചല് റാണിയെ വീടിനുള്ളില് തൂങ്ങിമരിച്ച നിലയില് കണ്ടെത്തിയത്. ഷീബാ എയ്ഞ്ചലും മുന്പ് മൂന്നാര് പോലീസ് സ്റ്റേഷനിലെ ഡ്രൈവറായിരുന്ന ശ്യാംകുമാറും തമ്മില് ഇഷ്ടത്തിലായിരുന്നു. വിവാഹിതനായിരുന്നു ശ്യാംകുമാര്. തന്റെ വൈവാഹിക ബന്ധം തകരാറിലാണെന്നും ഷീബയെ വിവാഹം ചെയ്യാമെന്നും ശ്യാംകുമാര് ഉറപ്പ് നല്കി. എന്നാല് മൂന്നാറില് നിന്ന് ശാന്തന്പാറ സ്റ്റേഷനിലേക്ക് സ്ഥലംമാറ്റമായതോടെ ഷീബയ്ക്ക് നല്കിയ വാഗ്ദാനങ്ങളില് നിന്ന് ശ്യാംകുമാര് പിന്മാറി.
ഇതില് മനംനൊന്തായിരുന്നു യുവതിയുടെ ആത്മഹത്യ. ഷീബ എയ്ഞ്ചലിന്റെ ബന്ധുക്കള് നല്കിയ പരാതിയുടെ അടിസ്ഥാനത്തില് ജില്ലാ പോലീസ് മേധാവി സംഭവത്തില് പ്രത്യേക അന്വേഷണം പ്രഖ്യാപിച്ചു. നാര്ക്കോട്ടിക് സെല് ഡിവൈഎസ്പി എ ജി ലാല് നടത്തിയ അന്വേഷണത്തില് ശ്യാംകുമാര് കുറ്റക്കാരനെന്ന് കണ്ടെത്തിയിരുന്നു.
