തിരുവനന്തപുരം: മന്ത്രി പി രാജീവിന് യാത്രക്കിടെ ബുദ്ധിമുട്ട് ഉണ്ടാക്കിയെന്ന് കാണിച്ച്‌ എസ്കോര്‍ട്ട് ഡ്യൂട്ടിയില്‍ ഉണ്ടായിരുന്ന രണ്ട് പോലീസ് ഉദ്യോഗസ്ഥര്‍ക്ക് സസ്പെന്‍ഷന്‍. നെയ്യാറ്റിന്‍കര നിന്നും എറണാകുളത്തേക്ക് പോകുന്നതിനിടെ പള്ളിച്ചല്‍ മുതല്‍ വെട്ടുറോഡ് വരെ മന്ത്രിക്ക് എസ്കോര്‍ട്ട് ചെയ്ത ഉദ്യോഗസ്ഥ‌രെയാണ് കമ്മീഷണര്‍ സസ്പെന്‍ഡ് ചെയ്തത്. ഗ്രേഡ് എസ് ഐ എസ്. എസ്.സാബുരാജന്‍, സി പി ഓ സുനില്‍ എന്നിവരെയാണ് സസ്പെന്‍ഡ് ചെയ്തത്.
യാത്രാമദ്ധ്യേ ഇവര്‍ മന്ത്രിയുടെ വാഹനത്തിന്റെ റൂട്ട് മാറ്റിയിരുന്നു. ഇതില്‍ മന്ത്രിക്ക് ബുദ്ധിമുട്ടും നീരസവും ഉണ്ടായി എന്ന് കാണിച്ചാണ് ഇരുവരെയും സസ്പെന്‍ഡ് ചെയ്തിരിക്കുന്നത്. മന്ത്രി തിരുവനന്തപുരം കമ്മീഷണറെ നേരിട്ട് വിളിച്ച്‌ പരാതി പറയുകയായിരുന്നു. റോഡിലെ ട്രാഫിക്ക് ബ്ലോക്ക് ഒഴിവാക്കുന്നതിന് വേണ്ടിയാണ് മന്ത്രിയുടെ വാഹനത്തിന്റെ റൂട്ട് മാറ്റിയതെന്നാണ് സസ്പെന്‍ഡ് ചെയ്യപ്പെട്ട ഉദ്യോഗസ്ഥര്‍ പറയുന്നത്.
