കണ്ണൂർ : ആറളത്ത് പോലീസുകാരനെ റോഡരികിൽ മരിച്ച നിലയിൽ കണ്ടെത്തി. കോഴിക്കോട് സിറ്റി ഡി.എച്ച്.ക്യു.വിലെ സിവിൽ പോലീസ് ഓഫീസർ ഷാമിൽ റഹ്മാനെയാണ് മരിച്ച നിലയിൽ കണ്ടെത്തിയത്. ഇന്ന് രാവിലെ ആറരയോടെ കണ്ണവം പോലീസ് സ്റ്റേഷൻ പരിധിയിലെ ചെറുവാഞ്ചേരി പുളിയൻ പീടികയിൽ വെച്ചാണ് മരിച്ച നിലയിൽ പ്രദേശവാസികൾ കണ്ടെത്തിയത്. ഷാമിൽ സഞ്ചരിച്ചിരുന്ന ബൈക്ക് അപകടത്തിൽപ്പെട്ടതാണ് മരണകാരണമെന്നാണ് പോലീസിന്റെ പ്രാഥമിക നിഗമനം.
കണ്ണവത്തുള്ള സഹപ്രവർത്തകന്റെ വിവാഹ ചടങ്ങിൽ പങ്കെടുക്കാനാണ് ഷാമിൽ എത്തിയത്. കല്യാണ ചടങ്ങുകൾക്ക് ശേഷം മടങ്ങിപ്പോകുന്നതിനിടയിലാണ് അപകടം സംഭവിച്ചതെന്നാണ് പ്രാഥമിക നിഗമനം. ഷാമിലിന്റെ മൃതദേഹം നിലവിൽ തലശ്ശേരി ജനറൽ ആശുപത്രിയിലേക്ക് മാറ്റിയിരിക്കുകയാണ്. കണ്ണവം പോലീസ് വിശദമായ അന്വേഷണം നടത്തിവരികയാണ്.
