പത്തനംതിട്ട : പോപ്പുലര് ഫിനാന്സ് തട്ടിപ്പ് കേസില് സി.ബി.ഐ യുടെ മൊഴിയെടുപ്പ് പത്തനംതിട്ടയില് ഇന്നലെ മുതല് ആരംഭിച്ചു. ടി.ബി റോഡിലുള്ള പി.ഡബ്ലിയു.ഡി റസ്റ്റ് ഹൌസില് വെച്ചാണ് തട്ടിപ്പിനിരയായ നിക്ഷേപകരുടെ മൊഴി രേഖപ്പെടുത്തുന്നത്. പതിനാലാം നമ്പര് മുറിയാണ് ഓഫീസാക്കിയിരിക്കുന്നത്. സി.ബി.ഐ കൊച്ചി ഓഫീസില് നിന്നുള്ള ഉദ്യോഗസ്ഥര് ഇതിനുവേണ്ടി പത്തനംതിട്ടയില് ക്യാമ്പ് ചെയ്യുകയാണ്. നിക്ഷേപകര് കൊച്ചി ഓഫീസില് എത്തി മൊഴി നല്കണമെന്നതായിരുന്നു നേരത്തെയുള്ള നടപടി. പ്രായം ചെന്നവരും യാത്ര ചെയ്യുവാന് ബുദ്ധിമുട്ടുള്ളവര്ക്കും ഇത് സാധ്യമല്ലായിരുന്നു. ഇക്കാര്യം നിക്ഷേപക സംഘടനകള് സി.ബി.ഐ ഉദ്യോഗസ്ഥരെ ധരിപ്പിച്ചിരുന്നു. ഇതിന്റെ അടിസ്ഥാനത്തിലാണ് ഇപ്പോള് ഈ നടപടി.
നിക്ഷേപകര്ക്ക് മുന്കൂട്ടി അറിയിപ്പ് നല്കിയതിനു ശേഷം അവരുടെ മാത്രം മൊഴിയാണ് രേഖപ്പെടുത്തുന്നത്. ഒരുദിവസം നാലോ അഞ്ചോ പേരുടെ മൊഴിയാണ് രേഖപ്പെടുത്തുന്നത്. പത്തനംതിട്ട ജില്ലയിലെ മുഴുവന് നിക്ഷേപകരുടെയും മൊഴി രേഖപ്പെടുത്തിയതിനുശേഷമേ സി.ബി.ഐ ഉദ്യോഗസ്ഥര് ഇവിടെനിന്നും പോവുകയുള്ളു. കേരളത്തിലെ എല്ലാജില്ലകളിലും ഇപ്രകാരം മൊഴിയെടുക്കുന്നുണ്ട്. മിക്ക ജില്ലകളിലും മൊഴിയെടുപ്പ് ആരംഭിച്ചിട്ടുണ്ട്.