തളിപ്പറമ്പ് : വിദ്യാര്ത്ഥിനിയായ പതിനഞ്ചുകാരിയെ ബലാത്സംഗം ചെയ്ത കേസില് പ്രതിക്ക് ജീവപര്യന്തവും, ആറ് വര്ഷം തടവും ,1.10 ലക്ഷം രൂപ പിഴയും കോടതി ശിക്ഷ വിധിച്ചു. പട്ടുവം കാവുങ്കലിലെ ആശാരിപണിക്കാരനായ ചെല്ലരിയന് അഭിലാഷിനെ (39)യാണ് തളിപ്പറമ്പ് ഫാസ്റ്റ് ട്രാക്ക് സ്പെഷല് കോടതി ജഡ്ജി സി.മുജീബ് റഹമാന് ശിക്ഷ വിധിച്ചത്.
2015 നവബറില് അവസാനത്തെ ശനിയാഴ്ച്ച രാവിലെ 9 മണിക്ക് ആരാധനാലയത്തില് പോയപ്പോള് ബലമായി തടഞ്ഞ് നിര്ത്തി ദേഹോപദ്രവം ഏല്പിച്ച് ബലാല്സംഗം ചെയ്യുകയും, സംഭവത്തെ കുറിച്ച് പുറത്ത് പറഞ്ഞാല് അച്ഛനമ്മമാരെ കൊല്ലുമെന്ന് പറഞ്ഞ് ഭിക്ഷണിപ്പെടുത്തി ഒന്നില് കുടുതല് തവണ മാനഭംഗപ്പെടുത്തിയെന്നുമാണ് കേസ്സ്.
2016 ഫെബ്രുവരി 29 നാണ് തളിപ്പറമ്പ് പോലിസ് കേസ്സ് രജിസ്റ്റര് ചെയ്തത്. അന്നത്തെ തളിപ്പറമ്പ് പോലിസ് സര്ക്കിള് ഇന്സ്പെക്ടറും ഇപ്പോള് കണ്ണൂര് റൂറല് ജില്ല സ്പെഷല് ബ്രാഞ്ച് ഡി.വൈ.എസ്.പിയുമായ കെ.വിനോദ് കുമാറാണ് കോടതിയില് കുറ്റം പത്രം നല്കിയത്. വാദിഭാഗത്തിനുവേണ്ടി സ്പെഷല് പബ്ലിക്ക് പ്രോസിക്യൂട്ടര് അഡ്വ: ഷെറിമോള് ജോസ് ഹാജരായി.
