ദുബായ് : എമിറേറ്റിലെ ചില റോഡുകളിൽ അപകടങ്ങളെ തുടർന്നുള്ള വാഹന തടസ്സങ്ങൾ നീക്കാനുള്ള സമയം എട്ട് മിനിറ്റായി കുറച്ചനടപടി കൂടുതൽ റോഡുകൾ ഉൾപ്പെടുത്തി റോഡ്സ് ആൻഡ് ട്രാൻസ്പോർട്ട് അതോറിറ്റി (ആർ.ടി.എ.) വിപുലീകരിക്കുന്നു. ദുബായ് പോലീസുമായി സഹകരിച്ച് അപകടങ്ങളിൽ പ്രതികരിക്കാൻ ആവശ്യമായ സമയം എട്ടിൽനിന്ന് ആറ് മിനിറ്റാക്കി. വാഹനാപകടങ്ങളിൽ പ്രതികരിക്കാനുള്ള സമയം കുറക്കുക ലക്ഷ്യമിട്ട് രൂപവത്കരിച്ച ട്രാഫിക് ഇൻസിഡന്റ് മാനേജ്മെന്റ് യൂണിറ്റ് (ടി.എം.യു.) പദ്ധതി കൂടുതൽ റോഡുകൾ ഉൾപ്പെടുത്തി വിപുലീകരിക്കും.
ഈ വർഷം അവസാനത്തോടെ പദ്ധതിയുടെ പരിധിയിലേക്ക് നാല് പ്രധാന റോഡുകൾ കൂടി വരും. ഇതോടെ പദ്ധതിയിലുള്ള റോഡുകളുടെ എണ്ണം 13-ൽനിന്ന് 17 ആയി വർധിക്കും. അതായത് മൊത്തം 951 കി.മീ റോഡുകളിലാണ് പദ്ധതി വ്യാപിപ്പിക്കുന്നത്.
