കിവ് : യുക്രെയ്നിലെ വിന്നിറ്റ്സിയയില് നടന്ന റഷ്യന് മിസൈലാക്രമണത്തില് 20 പേര് കൊല്ലപ്പെട്ടു. 90 പേര്ക്ക് പരിക്കുണ്ട്. ഇവിടത്തെ ഓഫിസ് കെട്ടിടവും സമീപത്തെ വീടുകളുമാണ് മിസൈലാക്രമണത്തില് തകര്ന്നത്. കിവ്ന് 268 കിലോമീറ്റര് അകലെയാണ് ഈ പട്ടണം. കൊല്ലപ്പെട്ടവരില് മൂന്നു കുട്ടികളും ഉള്പ്പെടും. കരിങ്കടലില്നിന്ന് റഷ്യന് മുങ്ങിക്കപ്പല് തൊടുത്ത മിസൈലാണ് പട്ടണത്തില് പതിച്ചത്. റഷ്യ ആക്രമണം സ്ഥിരീകരിച്ചിട്ടില്ല. യുക്രെയ്ന് വ്യോമപ്രതിരോധ സംവിധാനം നാലു മിസൈലുകളെ ലക്ഷ്യത്തിലെത്തുംമുമ്പ് തകര്ത്തതായി വിന്നിറ്റ്സിയ മേഖല ഗവര്ണര് അറിയിച്ചു.
