ശബരിമല : ഓണം പൂജയുമായി ബന്ധപ്പെട്ട് നട തുറക്കുന്ന സമയങ്ങളില് സന്നിധാനം, പമ്പ, നിലയ്ക്കല് ബേസ് ക്യാമ്പ് എന്നിവിടങ്ങളില് പ്ലാസ്റ്റിക് നിരോധനം, ശുചിത്വം എന്നിവ ഉറപ്പാക്കുന്നതിനും ശുചീകരണ പ്രവര്ത്തനം നിരീക്ഷിക്കുന്നതിനും ജില്ല കളക്ടര് എ.നിസാമുദ്ദീന് വിവിധ ഉദ്യോഗസ്ഥരെ നിയമിച്ചു. സന്നിധാനം, പമ്പ, നിലയ്ക്കല് ബേസ് ക്യാമ്പ് എന്നിവിടങ്ങളില് സാനിറ്റേഷന് സുപ്പര്വൈസര്, സ്ക്വാഡ് ലീഡര്, സ്ക്വാഡ് അംഗങ്ങള് എന്നീ ചുമതലകളും ലൈസന് ജോലികളും ഈ ഉദ്യോഗസ്ഥര് നിര്വഹിക്കും. സ്ക്വാഡ് പ്രവര്ത്തനങ്ങള്ക്ക് നിയോഗിക്കപ്പെട്ട ഉദ്യോഗസ്ഥര് ഹൈക്കോടതി ഉത്തരവ് പ്രകാരമുള്ള പ്ലാസ്റ്റിക് ഉല്പ്പന്ന നിരോധനം, നിരോധിത ഉല്പ്പന്നങ്ങളുടെ വില്പ്പന തടയല് തുടങ്ങിയ ചുമതല നിര്വഹിക്കും.
സാനിറ്റേഷന് സുപ്പര്വൈസര് ചുമതലയില് നിയോഗിക്കപ്പെട്ട ഉദ്യോഗസ്ഥര് സന്നിധാനം, പമ്പ, നിലയ്ക്കല് എന്നിവിടങ്ങളില് ശബരിമല സാനിറ്റേഷന് സൊസൈറ്റിക്ക് കീഴില് ശുചീകരണ പ്രവര്ത്തനങ്ങള്ക്ക് നിയോഗിക്കുന്ന ശബരിമല വിശുദ്ധിസേന അംഗങ്ങള് നടത്തുന്ന പ്രവര്ത്തികള്ക്ക് മേല്നോട്ടം വഹിക്കുകയും ഇവര്ക്ക് ആവശ്യമായ നിര്ദ്ദേശങ്ങള് നല്കുകയും ചെയ്യും. മാലിന്യം പമ്പ നദിയില് വലിച്ചെറിയല്, സന്നിധാനം, പമ്പ, നിലയ്ക്കല് എന്നിവിടങ്ങളില് മാലിന്യം നീക്കം ചെയ്യാതെയിരിക്കുക എന്നിവക്കെതിരെ നടപടി സ്വീകരിക്കും. ഓണം പൂജയുമായി ബന്ധപ്പെട്ട് ഓഗസ്റ്റ് 24 മുതല് 28 വരെ ദിവസങ്ങളിലാണ് ശബരിമല നട തുറക്കുക.
