ന്യൂഡല്ഹി: രാജ്യദ്രോഹക്കുറ്റം ചുമത്തപ്പെട്ട് ജയിലില് കഴിയുന്ന മലയാളി മാധ്യമപ്രവര്ത്തകന് സിദ്ധിഖ് കാപ്പന് അമ്മയുമായി വീഡിയോ കോണ്ഫറന്സിലൂടെ സംസാരിക്കാന് അനുമതി നല്കി സുപ്രീംകോടതി. സിദ്ദിഖ് കാപ്പനെ മോചിപ്പിക്കണമെന്ന് ആവശ്യപ്പെട്ട് കേരള പത്രപ്രവര്ത്തക യൂണിയന് നല്കിയ ഹര്ജി പരിഗണിക്കവെയാണ് സുപ്രീംകോടതി ഇതിന് അനുമതി നല്കിയത്.
സിദ്ധിഖ് കാപ്പന്റെ 90 വയസുള്ള അമ്മയെ മകനുമായി വീഡിയോ കോണ്ഫറന്സിലൂടെ സംസാരിക്കാന് അനുവദിക്കണമെന്ന് കപില് സിബല് ആവശ്യപ്പെട്ടു. നിരപരാധിത്വം തെളിയിക്കാന് നുണപരിശോധന ഉള്പ്പടെ ഏത് ശാസ്ത്രീയ പരിശോധനയ്ക്കും വിധേയനാകാന് സിദ്ദിഖ് കാപ്പന് തയാറാണെന്ന് കേരള പത്രപ്രവര്ത്തക യൂണിയന് സുപ്രീം കോടതിയെ അറിയിച്ചു.
ഉത്തര്പ്രദേശ് സര്ക്കാരിന് വേണ്ടി ഹാജരാകുന്ന സോളിസിറ്റര് ജനറല് തുഷാര് മേത്ത ആവശ്യപ്പെട്ടതിനെ തുടര്ന്ന് കെയുഡബ്ല്യുജെ നല്കിയ ഹര്ജി പരിഗണിക്കുന്നത് സുപ്രീം കോടതി അടുത്ത ആഴ്ചത്തേക്ക് മാറ്റിയത്.
യുപിയിലെ ഹത്രാസില് പെണ്കുട്ടി മരിച്ച സംഭവം റിപ്പോര്ട്ട് ചെയ്യാന് പോകുന്നതിനിടെയാണ് സിദ്ധിഖ് കാപ്പനെ ഉത്തര്പ്രദേശ് പോലീസ് അറസ്റ്റ് ചെയ്തത്. പിന്നീട് സിദ്ധിഖിനെതിരെ രാജ്യദ്രോഹക്കുറ്റം ചുമത്തുകയായിരുന്നു.
