ആറാട്ടുപുഴ : കാലവര്‍ഷം കനക്കുന്നതിനു മുമ്പ് തന്നെ കടല്‍ക്ഷോഭം ശക്തമായി. കരയിലേക്ക് ഇരച്ചുകയറുന്ന തിരകള്‍ ആറാട്ടുപുഴയുടെ വിവിധ ഭാഗങ്ങളില്‍ ദുരിതം വിതച്ചു. വലിയഴീക്കല്‍ – തൃക്കുന്നപ്പുഴ തീരദേശ റോഡ് കടല്‍ക്ഷോഭ ഭീഷണിയിലാണ്. നിരവധി വീടുകളും കടകളും ഏതു നിമിഷവും കടല്‍ എടുക്കാവുന്ന അവസ്ഥയിലാണ്. കടല്‍ഭിത്തി ദുര്‍ബല പ്രദേശങ്ങളിലാണ് കടല്‍ക്ഷോഭം നാശം വിതക്കുന്നത്. വലിയഴീക്കല്‍, പെരുമ്പള്ളി, എം.ഇ.എസ് ജങ്ഷന്‍, കാര്‍ത്തിക ജങ്ഷന്‍ എന്നിവിടങ്ങളിലാണ് കടല്‍ക്ഷോഭം കൂടുതല്‍ ദുരിതം വിതച്ചത്. ഇവിടെ 200 മീറ്ററോളം ഭാഗത്ത് റോഡില്‍ മണ്ണ് കയറി. നിരവധി വാഹനങ്ങള്‍ മണ്ണില്‍ പുതഞ്ഞു. ഗതാഗതം തടസ്സപ്പെട്ടിട്ടില്ല. റോഡിന് തൊട്ടടുത്തുവരെ കടല്‍ എത്തിക്കഴിഞ്ഞു. തീരദേശ റോഡ് കവിഞ്ഞ് കടല്‍വെള്ളം ഗ്രാമീണ റോഡുകളിലൂടെയും വീടുകളുടെ മുന്നിലൂടെയും കിഴക്കോട്ടൊഴുകി.
തീരദേശ റോഡിന് കിഴക്ക് അകലെയുള്ള വീടുകളില്‍വരെ കടല്‍ വെള്ളം ഒഴുകിയെത്തി. പെരുമ്പള്ളി ഭാഗത്ത് റോഡ് ഏതു സമയത്തും കടല്‍ എടുക്കാവുന്ന അവസ്ഥയിലാണ്. ബസ്സ്റ്റാന്‍ഡ് ഭാഗത്തെ കച്ചവടസ്ഥാപനങ്ങള്‍ അപകട ഭീഷണിയിലാണ്. ആറാട്ടുപുഴ ബസ് സ്റ്റാന്‍ഡ് മുതല്‍ തെക്കോട്ട് എ.കെ.ജി നഗര്‍ വരെയുള്ള ഭാഗത്ത് ഇക്കുറി കടല്‍ക്ഷോഭം കാര്യമായി ബാധിച്ചിട്ടില്ല. സമീപകാലത്ത് ടെട്രാപോഡ് ഉപയോഗിച്ചുള്ള പുലിമുട്ടുകള്‍ സ്ഥാപിച്ചതും പുലിമുട്ടിന് സ്ഥാപിക്കേണ്ട ടെട്രാപോഡുകള്‍ തീരത്ത് റോഡിന് സമാന്തരമായി അടുക്കിവെച്ചതുമാണ് ദുരിതം കുറയാന്‍ കാരണം.
