കോട്ടയം: ആർഎസ്എസ് പരിപാടിയിൽ വൈസ് ചാൻസലമാർ പങ്കെടുത്തതിൽ പ്രതിഷേധിച്ച് എംജി യൂണിവേഴ്സിറ്റി ക്യാമ്പസിൽ എസ്എഫ്ഐ പ്രതിഷേധം. അഡ്മിസ്ട്രേറ്റീവ് ബ്ലോക്കിലേക്ക് എസ്എഫ്ഐ മാർച്ച് നടത്തി. കടുത്ത എതിർപ്പിന്റെയും പ്രതിഷേധത്തിന്റേയും ഭാഷ്യമായി പ്രവർത്തകർ അഡ്മിനിസ്ട്രേറ്റീവ് ബ്ലോക്ക് ഉപരോധിച്ചു. സർവകലാശാല മൂല്യങ്ങൾ മനസ്സിലാക്കാൻ വൈസ് ചാൻസലർ ഗാന്ധിജിയെ പഠിക്കണമെന്ന് എസ്എഫ്ഐ ആവശ്യപ്പെട്ടു. പ്രതീകാത്മകമായി വൈസ് ചാൻസലറുടെ ഓഫീസിന് ഗാന്ധിജിയുടെ സത്യാന്വേഷണ പരീക്ഷണങ്ങൾ എന്ന പുസ്തകം കൈമാറി. എംജി വിസി ഡി മാവൂത്തിന് പുറമെ കേരള , മലയാളം സർവകലാശാല വിസിമാരും RSS പരിപാടിയിൽ പങ്കെടുത്തിരുന്നു.
ആർഎസ്എസിന് അടിയറ വയ്ക്കും കോൺഗ്രസ് സർക്കാർ തുലയട്ടെ എന്ന മുദ്രാവാക്യത്തോടെ ആയിരുന്നു എസ്എഫ്ഐ പ്രതിഷേധം. മോഹൻ ഭാഗവതിന്റെ പരിപാടിയിലാണ് വൈസ് ചാൻസലർമാർ പങ്കെടുത്തത്. തിരുവനന്തപുരം ഉദയ കൺവെൻഷൻ സെന്ററിലായിരുന്നു പരിപാടി. മാധ്യമങ്ങൾക്ക് നിയന്ത്രണം ഏർപ്പെടുത്തിയ RSS പരിപാടിയിൽ പങ്കെടുത്തത് ഏറെ വിമർശനങ്ങൾക്ക് വഴി വച്ചിരുന്നു. ‘സംഘപരിവാറിന്റെ നൂറു വർഷങ്ങൾ’ എന്നായിരുന്നു പരിപാടിയുടെ പേര്.
