റാന്നി: ഇട്ടിയപ്പാറ ബസ് സ്റ്റാൻഡ്, റോഡിനരികിലെ നടപ്പാതകള് എന്നിവിടങ്ങള് കൈയ്യേറി വഴിയോര വാണിഭം നടത്തി വന്നവര്ക്കെതിരെ നടപടിയുമായി പഞ്ചായത്തധികൃതര് രംഗത്ത്. അനധികൃത കച്ചവടക്കാർ, പാന്മസാല ചേര്ത്ത മുറുക്കാൻ കടകൾ എന്നിവ തെരുവുകളില് നിന്നും സ്വയം ഒഴിഞ്ഞുമാറണമെന്ന ആവശ്യവുമായി പഴവങ്ങാടി ഗ്രാമപഞ്ചായത്തിൽ നിന്നും സെക്രട്ടറി നോട്ടീസ് നൽകിയിരുന്നു. എന്നാല് നിശ്ചിത സമയ പരിധിക്കു ശേഷവും ഇവര് ഒഴിഞ്ഞു മാറാത്തതിനെ തുടർന്ന് ഇന്ന് ഉച്ചയ്ക്കുശേഷം നടപടിയുമായി അധികൃതര് എത്തിയത്. ഗ്രാമപഞ്ചായത്ത് പ്രസിഡന്റ് അനിത അനിൽകുമാർ, സെക്രട്ടറി ബി. കനകമണി, അസി.സെക്രട്ടറി കെ. പ്രദീപ്, പഞ്ചായത്ത് ഉദ്യോഗസ്ഥർ, പോലീസ് ഉദ്യോഗസ്ഥർ എന്നിവരുടെ നേതൃത്വത്തിലാണ് അനധികൃത കയ്യേറ്റങ്ങൾ ഒഴിപ്പിച്ചത്.
