പത്തനംതിട്ട : എസ്ഐആർ ഹിയറിങ് തീയതി നീട്ടാൻ തെരഞ്ഞെടുപ്പ് കമ്മീഷൻ തയ്യാറാകണമെന്ന് എസ്ഡിപിഐ സംസ്ഥാന സെക്രട്ടറി ജോൺസൺ കണ്ടച്ചിറ ആവശ്യപ്പെട്ടു. ഹിയറിങിന് ഹാജരാകാൻ നോട്ടീസ് ലഭിച്ചവർക്ക് രേഖകൾ ഹാജരാക്കാനുള്ള തീയതി ഈ മാസം 30ന് അവസാനിക്കുകയാണ്. എസ്ഐആർ ലിസ്റ്റിൽ നിന്നും പുറത്തായ 37 ലക്ഷം പേരിൽ പകുതിപേരുടെയും ഹിയറിങ് പൂർത്തിയായിട്ടില്ല. ഇപ്പോൾ നിശ്ചയിച്ചിട്ടുള്ള തീയതിയിൽ ഹിയറിങ് പൂർത്തിയാക്കുക എന്നത് അപ്രായോഗികമാണ്. ഇത് ജനങ്ങളിൽ വലിയ ആശങ്ക ഉണ്ടാക്കിയിട്ടുണ്ട്.
തലമുറകളായി വോട്ട് ചെയ്തുകൊണ്ടിരുന്നവർ സാങ്കേതിക കാരണങ്ങളാൽ എസ്ഐആർ ലിസ്റ്റിൽ നിന്നും പുറത്താകുന്നത് പൗരാവകാശങ്ങളുടെ ലംഘനമാണ്. അതിനാൽ മുഴുവൻ പൗരന്മാർക്കും സമ്മതിദാനാവകാശം ഉറപ്പാക്കാൻ തെരഞ്ഞെടുപ്പ് കമ്മീഷൻ തയ്യാറാകണമെന്നും മുഴുവൻ പൗരന്മാർക്കും ഹിയറിങ് പൂർത്തിയാകുന്നത് വരെ തീയതി നീട്ടണമെന്നും അദ്ദേഹം ആവശ്യപ്പെട്ടു.
