കൊളംബോ : മൂന്നാം ഏകദിനത്തിൽ 78 റൺസ് ജയത്തോടെ ദക്ഷിണാഫ്രിക്കയ്ക്കെതിരായ ഏകദിന പരമ്പര ശ്രീലങ്ക സ്വന്തമാക്കി. ആദ്യം ബാറ്റ് ചെയ്ത് 203 റൺസെടുത്ത ആതിഥേയർ ദക്ഷിണാഫ്രിക്കയെ 30 ഓവറിൽ 125 റൺസിന് പുറത്താക്കി. ഓഫ് സ്പിന്നർ മഹീഷ് തീക്ഷണ 4 വിക്കറ്റു വീഴ്ത്തി. 22 റൺസെടുത്ത ഹെൻറിച്ച് ക്ലാസനാണ് ദക്ഷിണാഫ്രിക്കൻ നിരയിലെ ടോപ് സ്കോറർ.
ഒന്നര വർഷത്തിനുശേഷമാണ് ശ്രീലങ്ക ഒരു ഏകദിന പരമ്പര സ്വന്തമാക്കുന്നത്. ആദ്യ ഏകദിനം ശ്രീലങ്കയും രണ്ടാം ഏകദിനം ദക്ഷിണാഫ്രിക്കയും ജയിച്ചതോടെ അവസാന മത്സരം പരമ്പരയുടെ ഫൈനലായി മാറുകയായിരുന്നു. ട്വന്റി20 പരമ്പര വെള്ളിയാഴ്ച ആരംഭിക്കും
