തിരുവനന്തപുരം : ഇതര സര്വകലാശാലകളിലെ വിദൂര വിദ്യാഭ്യാസ കേന്ദ്രങ്ങള് നിര്ത്തലാക്കി ശ്രീനാരായണ ഗുരു ഓപ്പണ് സര്വകലാശാല ആരംഭിക്കുന്നത് മതിയായ കോഴ്സുകളില്ലാതെ. കേരള സര്വകലാശാലയില് നിലവില് 12 ബിരുദ കോഴ്സുകളും 13 പി.ജി കോഴ്സുകളുമാണ് വിദൂര വിദ്യാഭ്യാസത്തിന് കീഴില് നടത്തുന്നത്. കാലിക്കറ്റില് 14 ബിരുദ കോഴ്സുകളും 12 പി.ജി കോഴ്സുകളുമാണുള്ളത്.
എന്നാല് 12 ബിരുദ കോഴ്സുകളും അഞ്ച് പി.ജി കോഴ്സുകളുമായാണ് ഓപ്പണ് സര്വകലാശാല ആരംഭിക്കുന്നത്. ഇതര സര്വകലാശാലകളില് പഠനാവസരം നിര്ത്തലാക്കുമ്പോള് അവിടെയുള്ള കോഴ്സുകള് ഓപ്പണ് സര്വകലാശാലയില് ആരംഭിക്കണം. അല്ലെങ്കില് ഈ സര്വകലാശാലകളില്നിന്ന് ബിരുദ കോഴ്സ് പൂര്ത്തിയാക്കിയ കുട്ടികള്ക്ക് നിശ്ചിത വിഷയത്തില് ഓപ്പണ് സര്വകലാശാലയില് പി.ജി കോഴ്സില്ലാത്ത സാഹചര്യമുണ്ടാകും.
ഇംഗ്ലീഷ്, മലയാളം, ഹിസ്റ്ററി, സോഷ്യോളജി, കൊമേഴ്സ് വിഷയങ്ങളില് മാത്രമാണ് ഓപ്പണ് സര്വകലാശാല പി.ജി കോഴ്സുകള് തുടങ്ങുന്നത്. എന്നാല് കാലിക്കറ്റ്, കേരള സര്വകലാശാലകള്ക്ക് കീഴിലായി ഇക്കണോമിക്സ്, അറബിക്, ഇംഗ്ലീഷ്, ഹിന്ദി, ഹിസ്റ്ററി, മലയാളം, പൊളിറ്റിക്കല് സയന്സ്, ഫിലോസഫി, സംസ്കൃതം, സോഷ്യോളജി, കൊമേഴ്സ്, എം.എസ്സി മാത്സ്, പബ്ലിക് അഡ്മിനിസ്ട്രേഷന്, എം.എല്.ഐ.എസ്സി, എംഎസ്സി മാത്സ്, കമ്പ്യൂട്ടര് സയന്സ്, എം.ബി.എ കോഴ്സുകള് നടത്തിവരുന്നുണ്ട്. ഓപ്പണ് സര്വകലാശാലയില് ഇത് അഞ്ച് കോഴ്സുകളിലേക്ക് ചുരുങ്ങുമ്പോള് മറ്റ് കോഴ്സുകള്ക്കായി കുട്ടികള് കേരളത്തിന് പുറത്തുള്ള സര്വകലാശാലകളെ ആശ്രയിക്കേണ്ടിവരും.
കാലിക്കറ്റില് ബിരുദതലത്തില് ബി.എ അറബിക്, ബി.എ അഫ്ദലുല് ഉലമ കോഴ്സുകള് വെവ്വേറെ നടത്തുന്നുണ്ടെങ്കില് ഓപ്പണ് സര്വകലാശാലയില് ബി.എ അറബിക് കോഴ്സ് മാത്രമാണുള്ളത്. കാലിക്കറ്റില് കോഴ്സ് തുടരാനായില്ലെങ്കില് വിദൂരവിദ്യാഭ്യാസത്തിലൂടെ അഫ്ദലുല് ഉലമ പഠനത്തിനുള്ള അവസരം ഇല്ലാതായിമാറും.
