കണ്ണൂര് : കമ്യൂണിസ്റ്റ് പ്രസ്ഥാനവുമായുള്ള തന്റെ ബന്ധത്തിന് നല്ല തെളിവ് തന്റെ പേര് തന്നെയാണെന്ന് തമിഴ്നാട് മുഖ്യമന്ത്രി എം കെ സ്റ്റാലിന്. പ്രസ്ഥാനവുമായി അഭേദ്യമായ ബന്ധമാണ് തനിക്കുള്ളത്. പിണറായി വിജയന് മതേതരത്വത്തിന്റെ മുഖമാണെന്നും അദ്ദേഹം പറഞ്ഞു. സിപിഐഎം 23ാം പാര്ട്ടി കോണ്ഗ്രസിന്റെ സെമിനാറിൽ സംസാരിക്കുകയായിരുന്നു അദ്ദേഹം.
കണ്ണൂര് ത്യാഗത്തിന്റെ ഭൂമിയാണ്. ജനാധിപത്യ സര്ക്കാരിനെ ആദ്യമായി കേന്ദ്രം പിരിച്ചുവിട്ടത് കേരളത്തിലാണെന്നും തമിഴ്നാട്ടില് ഡിഎംകെ സര്ക്കാരിനെ കേന്ദ്രം രണ്ട് തവണ പിരിച്ചുവിട്ടുവെന്നും അദ്ദേഹം ഓര്മ്മിപ്പിച്ചു. ഇന്ത്യയിലെ വേറിട്ട മുഖ്യമന്ത്രിയാണ് പിണറായി വിജയന്. ഭരണത്തില് അദ്ദേഹം തനിക്ക് വഴികാട്ടിയാണ്. സെമിനാറില് പങ്കെടുക്കുന്നത് നിങ്ങളില് ഒരാളായാണ്. ആവേശത്തോടെയാണ് സെമിനാറിലേക്ക് എത്തിയതെന്നും അദ്ദേഹം പറഞ്ഞു സെമിനാറില് ബിജെപി നേതൃത്വത്തിന് എതിരെ രൂക്ഷവിമര്ശനവും സ്റ്റാലിന് നടത്തി. നാനാത്വം അട്ടിമറിച്ച് ഏകത്വം നടപ്പാക്കാന് ബിജെപി ശ്രമിക്കുകയാണ്. ബ്രിട്ടീഷുകാര് പോലും നടപ്പാക്കാത്ത നയമാണ് കേന്ദ്രത്തിന്റേതെന്നും സ്റ്റാലിന് കുറ്റപ്പെടുത്തി.
