റാന്നി : സൂര്യഗ്രഹണത്തെ ആഴത്തിലറിയാൻ സൗരക്കണ്ണട നിര്മിച്ച് പഴവങ്ങാടി ഗവൺമെന്റ് യുപി സ്കൂൾ വിദ്യാര്ഥികള്. ഗ്രഹണങ്ങൾ എങ്ങനെ നടക്കുന്നു എന്ന് സ്വന്തമായി നിർമിച്ച പഠനോപകരണത്തിന്റെ സഹായത്തോടെ എഫ്.അജിനി ടീച്ചർ വിശദീകരിച്ചു. ഒപ്പം ഗ്രഹണവുമായി ബന്ധപ്പെട്ട അന്ധ വിശ്വാസങ്ങളും കുട്ടികളെ ബോധിപ്പിച്ചു. പ്രവർത്തനങ്ങൾക്ക് പ്രഥമാധ്യാപകൻ ഷാജി തോമസ് നേതൃത്വം നൽകി.
ഗ്രഹണം വൈകുന്നേരമായതിനാൽ കുട്ടികൾ നിർമിച്ച സൗരക്കണ്ണട രക്ഷിതാക്കൾക്കും ഉപയോഗിക്കാം. ഒക്ടോബർ 25ന് സംഭവിക്കുന്ന സൂര്യഗ്രഹണം ഉത്തരേന്ത്യയിലും കേരളത്തിന്റെ വടക്കൻ ഭാഗത്തും കാണാൻ കഴിയും. കാസർഗോഡ് ജില്ലയിൽ ഏകദേശം 10% മറക്കപ്പെടുന്നു. ഇവിടെ വൈകിട്ട് 5.11 നാണ് ഗ്രഹണം ആരംഭിക്കുന്നത്. കേരളത്തിൽ ഗ്രഹണം കൂടുതൽ വ്യക്തമായി കാണാനാവുക കാസർഗോഡ് ജില്ലയിലാണ്.
മധ്യകേരളത്തിൽ വൈകിട്ട് 5..20ന് ഗ്രഹണം ആരംഭിക്കും. ഏറ്റവും ശക്തമാകുന്നത് 5.53നാണ്. കേരളത്തിൽ ഏറ്റവും ശക്തി കുറഞ്ഞ ഗ്രഹണം അനുഭവപ്പെടുന്നത് തിരുവനന്തപുരത്താണ്. ഇവിടെ വൈകിട്ട് 5. 29ന് ഗ്രഹണം ആരംഭിക്കും. 6.1ന് ഗ്രഹണം ബാധിച്ച നിലയിൽ സൂര്യൻ അസ്തമിക്കും. സൂര്യന്റെ അസ്തമയത്തിന് തൊട്ടു മുമ്പാണ് കേരളത്തിൽ ഗ്രഹണം ദൃശ്യമാകുക എന്നതിനാൽ ഇത് നിരീക്ഷിക്കാൻ സൂര്യാസ്തമയം കാണാവുന്ന സ്ഥലം വേണം തെരഞ്ഞെടുക്കാൻ.
