തിരുവനന്തപുരം : വൈറസ് ബാധിതയായി മെഡിക്കല് കോളേജ് ആശുപത്രിയിലെ തീവ്രപരിചരണ വിഭാഗത്തില് ചികിത്സയില് കഴിയുന്ന കവയിത്രി സുഗതകുമാരിയുടെ നില ഗുരുതരമായി തുടരുന്നു. വെന്റിലേറ്ററിന്റെ സഹായത്താലാണ് ശ്വസിക്കുന്നത്. ഹൃദയത്തിന്റെ പ്രവര്ത്തനത്തിനും തകരാര് സംഭവിച്ചിട്ടുണ്ട്. മരുന്നുകളോട് തൃപ്തികരമായി പ്രതികരിക്കുന്നില്ലെന്ന് ആശുപത്രി സൂപ്രണ്ട് ഡോ എം എസ് ഷര്മ്മദ് അറിയിച്ചു. വിദഗ്ധ ഡോക്ടര്മാരുടെ സംഘത്തിന്റെ സൂക്ഷ്മ നിരീക്ഷണത്തിലാണ് സുഗതകുമാരി ഇപ്പോള് .
തിങ്കളാഴ്ചയാണ് സുഗതകുമാരിയെ തലസ്ഥാനത്തെ സ്വകാര്യ ആശുപത്രിയില് നിന്ന് മെഡിക്കല് കോളേജ് ആശുപത്രിയില് പ്രവേശിപ്പിച്ചത്. ആശുപത്രിയിലെത്തുമ്പോള് ബ്രോങ്കോ ന്യുമോണിയയെ തുടര്ന്നുള്ള ശ്വാസതടസമാണ് പ്രധാന പ്രശ്നമായി ഉണ്ടായിരുന്നത്. ആശുപത്രിയില് പ്രവേശിപ്പിച്ചയുടന് വിദഗ്ധ ഡോക്ടര്മാരുടെ സംഘം പരിശോധിക്കുകയും തീവ്രപരിചരണ വിഭാഗത്തിലെ വെന്റിലേറ്ററിലേയ്ക്ക് മാറ്റുകയും ചെയ്തിരുന്നു.
ഞായറാഴ്ച രാത്രി പനി അനുഭവപ്പെട്ടതിനെ തുടര്ന്നാണ് സുഗതകുമാരിയെ സ്വകാര്യ ആശുപത്രിയില് പ്രവേശിപ്പിച്ചത്. ഇന്നലെ രാവിലെയാണ് വൈറസ് പരിശോധന നടത്തിയത്. സ്വകാര്യ ആശുപത്രിയില് വെന്റിലേറ്ററിന്റെ സഹായത്തോടെ ചികിത്സയിലായിരിക്കെയാണ് അവിടെ നിന്ന് വൈകിട്ട് നാലോടെ മെഡിക്കല് കോളേജിലെത്തിച്ചത്.
