കോന്നി : പ്ലാന്റേഷന് എന്ന് കേള്ക്കുമ്പോള് റബ്ബര് കൃഷി മാത്രം കടന്ന് വരുന്ന മലയാളി മനസില് പാഷന് ഫ്രൂട്ട് കൃഷിയിലൂടെ മധുരം നിറയ്ക്കുകയാണ് തണ്ണിത്തോട് പ്ലാന്റേഷന് കോര്പ്പറേഷന് എസ്റ്റേറ്റ്. ആറ് മാസങ്ങള്ക്ക് മുന്പ് പരീക്ഷണാടിസ്ഥാനത്തില് ഇവിടെ ആരംഭിച്ച കൃഷി വിപുലപ്പെടുത്തുകയാണ് അധികൃതര്. തേക്കുതോട് റോഡിന് സമാന്തരമായി ഒഴുകുന്ന കല്ലാറിന്റെ കരയില് പ്ലാന്റേഷന് കോര്പ്പറേഷന്റെ ഉടമസ്ഥതയിലുള്ള ഒരു ഹെക്ടര് ഭൂമിയിലാണ് ഫാഷന് ഫ്രൂട്ട് വിളയിക്കുന്നത്.
കൃഷിയുടെ ആദ്യ ഘട്ടത്തില് കൊടുമണ് എസ്റ്റേറ്റില് നിന്ന് എത്തിച്ച വിത്ത് പാകി രണ്ടായിരത്തോളം പാഷന് ഫ്രൂട്ട് തൈകള് തയ്യാറാക്കിയിരുന്നു. നൂറ്റി ഇരുപത് തൈകളാണ് ആദ്യഘട്ടമായി നട്ടുപിടിപ്പിച്ചത്. ഇരുമ്പ് തൂണുകള് നാട്ടി അതിന് മുകളില് ഒരുക്കിയ പന്തലില് പടര്ന്ന് കയറിയ പാഷന് ഫ്രൂട്ട് വള്ളികളില് ഇപ്പോള് പഴങ്ങള് കായ്ച്ച് തുടങ്ങിയിരിക്കുന്നു. നാനൂറ് തൈകള് കൂടി നടാനുള്ള ക്രമീകരണങ്ങളും ആരംഭിച്ചു.
പ്ലാന്റേഷന്റെ കൊടുമണ്, ചന്ദനപ്പള്ളി എസ്റ്റേറ്റുകളില് വന് തോതില് പാഷന് ഫ്രൂട്ട് കൃഷി ചെയ്ത് വിജയം കണ്ടിരുന്നു. ഇതാണ് തണ്ണിത്തോട്ടിലും കൃഷി ആരംഭിക്കാന് അധികൃതര്ക്ക് പ്രചോദനമായത്. എസ്റ്റേറ്റ് പരിസരത്തെ തരിശുനിലങ്ങള് പ്രയോജനപ്പെടുത്തി ചീമേനിയില് നിന്ന് എത്തിയ കറുവപ്പട്ടയും മംഗള, മോഹിത് നഗര് കമുകിന് തൈകളും കുറ്റ്യാടി, ഗംഗാ ബോണ്ടം തെങ്ങിന് തെകളും വിയറ്റ്നാം സൂപ്പര് ഏര്ലി പ്ലാവും ഇവിടെ വിളയുന്നുണ്ട്. പ്ലാന്റേഷനിലെ കറുവ പട്ടയും വിളവെടുക്കാന് പാകമായി. ഇത് ഉടന് തന്നെ വിളവെടുക്കാനാണ് അധികൃതരുടെ തീരുമാനം.
