ന്യൂഡൽഹി : ഇ.ഡി, സിബിഐ ഡയറക്ടർമാരുടെ കാലാവധി അഞ്ച് വർഷത്തേക്ക് നീട്ടുന്നത് സംബന്ധിച്ച ഓർഡിനൻസുമായി കേന്ദ്ര സർക്കാർ. നിലവിൽ രണ്ട് വർഷമാണ് കേന്ദ്ര ഏജൻസികളുടെ തലവന്മാരുടെ കാലാവധി. കാലാവധി നീട്ടുന്നത് സംബന്ധിച്ച രണ്ട് ഓർഡിനൻസുകളിലും രാഷ്ട്രപതി രാംനാഥ് കോവിന്ദ് ഒപ്പുവെച്ചുവെന്ന് വാർത്താ ഏജൻസി റിപ്പോർട്ടു ചെയ്തു. ഓർഡിനൻസ് പ്രകാരം അന്വേഷണ ഏജൻസി തലവന്മാരുടെ കാലാവധി രണ്ട് വർഷം പൂർത്തിയായശേഷം ഓരോ വർഷം വീതം മൂന്ന് തവണ നീട്ടാം.
നിലവിൽ 1985 ബാച്ചിലെ ഐപിഎസ് ഓഫീസറായ സുബോധ് കുമാർ ജെയ്സ്വാളാണ് സിബിഐ തലവൻ. 2021 മെയ് മാസത്തിലാണ് അദ്ദേഹത്തെ രണ്ടു വർഷത്തേക്ക് നിയമിച്ചത്. ഐആർഎസ് ഉദ്യോഗസ്ഥനായ സഞ്ജയ് കുമാർ മിശ്രയാണ് നിലവിൽ ഇ.ഡി മേധാവി. 2018 നവംബറിലാണ് അദ്ദേഹത്തെ നിയമിച്ചത്. 2020 നവംബറിൽ അദ്ദേഹത്തിന്റെ കാലാവധി കേന്ദ്ര സർക്കാർ ഒരു വർഷത്തേക്കുകൂടി നീട്ടിയിരുന്നു.