ന്യൂഡല്ഹി : ഡല്ഹിയില് കോവിഡ് കാലത്ത് അടച്ചിട്ട എല്ലാ ആരാധനാലയങ്ങളും തുറന്നുകൊടുത്തിട്ടും താഴത്തെ നിലയില് ഏതാനും പേര്ക്ക് നമസ്കാരം പരിമിതപ്പെടുത്തി കടുത്തനിയന്ത്രണം തുടരുന്ന നിസാമുദ്ദീനിലെ തബ്ലീഗ് ആസ്ഥാനത്തെ ബംഗ്ലേവാലി പള്ളിയുടെ മുകള് നിലകള് ‘ശഅ്ബേ ബറാത്തി’ന് നിയന്ത്രണങ്ങളോടെ ഒരു ദിവസത്തേക്ക് മാത്രം തുറക്കാമെന്ന് ഹൈകോടതി. ഒരു ദിവസം ഉച്ചക്ക് 12 മുതല് പിറ്റേന്ന് വൈകീട്ട് നാലു വരെ മാത്രം തുറന്ന് സാമൂഹിക അകലവും കോവിഡ് പ്രോട്ടോകോളും പാലിച്ച് ഓരോ നിലയലും 100 പേര്ക്ക് വീതം നമസ്കരിക്കാന് അനുവാദം നല്കാമെന്നാണ് ഹൈകോടതി വ്യക്തമാക്കിയത്. വിദേശികള് പള്ളിയില് നമസ്കരിക്കാന് വരരുതെന്ന് ഡല്ഹി പോലീസ് നിര്ദേശം നല്കിയിട്ടുണ്ട്.
കോവിഡ് വ്യാപനം ആരോപിച്ച് അടച്ചിടും മുമ്പ് ആയിരക്കണക്കിനാളുകള് സ്ഥിരമായി പ്രാര്ഥനക്ക് എത്താറുണ്ടായിരുന്ന പള്ളി രണ്ടു വര്ഷം കഴിഞ്ഞിട്ടും പൂര്ണമായും തുറന്നുകൊടുത്തിട്ടില്ല. മര്കസ് പള്ളി കോവിഡ് വ്യാപിപ്പിച്ചെന്ന പ്രചാരണം വ്യാജമാണെന്ന് കോടതി വിധിച്ചിരുന്നു. ഡല്ഹിയില് എല്ലാ ആരാധനാലയങ്ങളിലും നിയന്ത്രണങ്ങള് എടുത്തുകളഞ്ഞിട്ടും നിസാമുദ്ദീന് മര്കസിലെ പള്ളി മാത്രമാണ് അടച്ചിട്ടിരിക്കുന്നത്. വളരെ പരിമിതമായ ആളുകള്ക്കായി താഴത്തെ നില മാത്രം കഴിഞ്ഞ വര്ഷം ഏപ്രില് 15ന് തുറന്നുകൊടുത്ത ഹൈകോടതി കേന്ദ്ര സര്ക്കാറിന്റെ എതിര്പ്പിനെ തുടര്ന്നാണ് പള്ളി പൂര്ണമായും തുറക്കാത്തത്.
പള്ളി തുറന്നുകിട്ടാന് ഹൈക്കോടതിയെ സമീപിച്ച ഡല്ഹി വഖഫ് ബോര്ഡ് നടപടിയും കേന്ദ്രം ചോദ്യം ചെയ്തു. കേസിലുള്ള പള്ളിയാണ് അതെന്നാണ് കേന്ദ്രത്തിന്റെ വാദം. പള്ളിയുടെ അടച്ചിട്ട മൂന്നു നിലകള്കൂടി ‘ശഅ്ബേ ബറാത്തി’ന് ഒരു ദിവസത്തേക്ക് മാത്രം തുറക്കാമെന്നാണ് ബുധനാഴ്ച ഡല്ഹി ഹൈക്കോടതി പുറപ്പെടുവിച്ച ഉത്തരവ്.
