കോന്നി : ലൈഫ് ഭവന പദ്ധതി ഫണ്ട് തട്ടിപ്പ് കേസില് പിടിയിലായ തണ്ണിത്തോട് വില്ലേജ് എക്സ്റ്റന്ഷന് ഓഫീസര് എം.ആര്.റാണി ലക്ഷ്മി മുന്പ് ജോലി ചെയ്തിരുന്ന അരുവാപ്പുലം ഗ്രാമപഞ്ചായത്തിലും ലക്ഷങ്ങളുടെ തട്ടിപ്പ് നടത്തിയതായി പരിശോധനയില് കണ്ടെത്തി. അരുവാപ്പുലം പഞ്ചായത്തില് മാത്രം ഏകദേശം 15 ലക്ഷത്തോളം രൂപയുടെ തട്ടിപ്പ് നടത്തിയതായാണ് പ്രാഥമിക പരിശോധനയില് കണ്ടെത്തിയിട്ടുള്ളത്. ഇതിനെ തുടര്ന്ന് കോന്നി ബ്ലോക്ക് പഞ്ചായത്തിലെ ഉദ്യോഗസ്ഥരുടെ നേതൃത്വത്തില് വിശദമായ പരിശോധന ആരംഭിച്ചിട്ടുണ്ട്. അരുവാപ്പുലം പഞ്ചായത്തിലെ ലൈഫ് ഗുണഭോക്തൃ ലിസ്റ്റില് ഉള്പ്പെട്ടിട്ടുള്ള ആളുകളില് സമാനമായ പേരുള്ളവരെയും പ്രതിയുടെ അമ്മ, ഭര്ത്താവ്, ഭതൃമാതാവ്, ഭതൃപിതാവ് എന്നിവരുള്പ്പെടെയുള്ള അടുത്ത ബന്ധുക്കളെയും സുഹൃത്തുക്കളെയും ഗുണഭോക്താക്കളാക്കി മാറ്റിയാണ് ഇവര് ലക്ഷങ്ങള് തട്ടിയെടുത്തത്.
പലര്ക്കും നാല് ലക്ഷം രൂപ നല്കേണ്ട സ്ഥാനത്ത് പല ആളുകളുടെ പേരിലും അഞ്ചും ആറും ലക്ഷം രൂപ വീതം അനുവദിപ്പിച്ച് തുക തട്ടിയെടുത്തതായാണ് അന്വേഷണ സംഘത്തിന്റെ കണ്ടെത്തല്. തണ്ണിത്തോട്, സീതത്തോട് പഞ്ചായത്തുകളില് നിന്ന് മാത്രം 53 ലക്ഷത്തോളം രൂപ ഇവര് തട്ടിയെടുത്തതായി കണ്ടെത്തിയിട്ടുണ്ട്. ഇതിന് പിന്നാലെയാണ് അരുവാപ്പുലം പഞ്ചായത്തിലും ഇവര് നടത്തിയ ക്രമക്കേടുകളുടെ വിവരങ്ങള് പുറത്ത് വന്നിരിക്കുന്നത്. തണ്ണിത്തോട്, സീതത്തോട് പഞ്ചായത്തുകളില് നടന്ന തട്ടിപ്പ് പുറത്ത് വന്നതോടെ ഇവര് ജോലി ചെയ്ത അരുവാപ്പുലം പഞ്ചായത്തിലും പരിശോധന നടത്തണമെന്ന് ഭരണസമിതി ആവശ്യപ്പെടുകയായിരുന്നു. ഇതിനെ തുടര്ന്നാണ് പരിശോധന നടന്നത്. അരുവാപ്പുലം പഞ്ചായത്തിലെ തട്ടിപ്പുമായി ബന്ധപ്പെട്ട് ഭരണസമിതി ഉന്നത ഉദ്യോഗസ്ഥര്ക്കും പരാതി നല്കിയുണ്ട്.
