റിയാദ്​ വിമാനത്താവളത്തിലേക്ക്​ ഹൂതികൾ നടത്തിയ ആക്രമണത്തിൽ ഗുരുതര പരിക്കേറ്റ മലയാളിയുടെ ആരോഗ്യ നില മെച്ചപ്പെടുന്നു

റിയാദ്​: ഒക്​ടോബർ പത്തിന്​ റിയാദ്​ വിമാനത്താവളത്തിലേക്ക്​ ഹൂതികൾ നടത്തിയ ആക്രമണത്തിൽ ഗുരുതര പരിക്കേറ്റ മലയാളിയുടെ ആരോഗ്യ നില മെച്ചപ്പെടുന്നു. പാലക്കാട്​ സ്വദേശിയും റിയാദ്​ വിമാനത്താവളത്തി​ലെ കരാർ ജീവനക്കാരനുമായ മുഹമ്മദ്​ റബ്ബാനി (29)യുടെ ആരോഗ്യ നിലയാണ്​ ഭേദപ്പെടുന്നത്​. കഴിഞ്ഞ ദിവസം റബ്ബാനിക്ക്​ ശസ്​ത്രക്രിയ പൂർത്തിയാക്കിയിരുന്നു. ഇടതുകാലിന്‍റെ ശസ്​ത്രക്രിയ നടത്തിയ ശേഷവും വെന്‍റിലേറ്ററിൽ തുടരുകയായിരുന്നു. ഇപ്പോൾ വെന്‍റിലേറ്ററിൽ നിന്ന്​ ബേൺ ഐസിയുവിലേക്ക്​ മാറ്റിയിട്ടുണ്ട്​. ഇനി പ്ലാസ്റ്റിക്​ സർജറികൾ അടക്കമാണ്​ പൂർത്തിയാക്കാനുള്ളത്​.

വരും ദിവസങ്ങളിൽ ഇവയും നടക്കുമെന്നാണ്​ അറിയുന്നത്​.റിയാദ്​ വിമാനത്താവളത്തിലേക്ക്​ ഒക്ടോബർ പത്തിന്​ നടത്തിയ ആക്രമണത്തിൽ ഒരു​ ഇന്ത്യക്കാരനും നാല്​ സൗദി സ്വദേശികളും അടക്കം 13 പേരാണ്​ കൊല്ലപ്പെട്ടത്​. 309 ​പേർക്ക്​ പരിക്കേറ്റിരുന്നു. ഇതിൽ 11 പേർ ഇന്ത്യക്കാർ ആയിരുന്നു. പരിക്കേറ്റവരിൽ കുറച്ചുപേർ ചികിത്സ പൂർത്തിയാക്കിയ ​ശേഷം ആശുപത്രി വിട്ടിട്ടുണ്ട്​. ബാക്കിയുള്ളവരുടെ ചികിത്സ അടക്കമുള്ള കാര്യങ്ങൾ ​ഇന്ത്യൻ എംബസിയും കോൺസുലേറ്റും മറ്റ്​ അധികൃതരും അന്വേഷിക്കുന്നുണ്ട്​.