ചിറ്റാര് : ചിറ്റാര് ഫാക്ടറിപ്പടി ചപ്പാത്ത് പാലത്തിന് കൈവരിയില്ലാത്തത് അപകടഭീഷണിയാകുന്നു. സ്കൂള് വിദ്യാര്ഥികള് ഉള്പ്പെടെ നിരവധി ആളുകള് സഞ്ചരിക്കുന്ന പാലത്തിന്റെ പകുതി ഭാഗത്ത് മാത്രമാണ് കൈവരിയുള്ളത്. ഇതിനാല് തന്നെ ഭീതിയോടെയാണ് ആളുകള് ഈ വഴി സഞ്ചരിക്കുന്നത്. മുന്പ് ഒന്നില് കൂടുതല് തവണ കൈവരി നിര്മ്മിച്ചു എങ്കിലും ചെറിയ പാലത്തിനടിയിലെ വലിയ തോട്ടില് കൂടി ശക്തിയായി വെള്ളം ഒഴുകി വന്നപ്പോള് കൈവരി തകര്ന്നുപോവുകയാണ് ചെയ്തത്. ചെറിയ പാലം പൊളിച്ച് കളഞ്ഞ് പുതിയത് നിര്മ്മിക്കാന് അധികൃതര് അടിയന്തിര നടപടി സ്വീകരിക്കണമെന്നാണ് നാട്ടുകാര് ആവശ്യപ്പെടുന്നത്.
നാല്പത് വര്ഷം മുന്പ് ഈ തോട്ടില് ഒരു ജീപ്പ് ഒഴുക്കില്പെട്ട് ഒരു കുട്ടി മരണപ്പെടുകയും ചെയ്തിരുന്നു. വര്ഷങ്ങളായി നാട്ടുകാര് ഈ വിഷയം മാറി മാറിവന്ന ജനപ്രതിനിധികളോട് ഉന്നയിച്ചിട്ടും യാതൊരു നടപടിയുമില്ല. ഉയരം കൂടിയ പുതിയ പാലം നിര്മ്മിക്കുമെന്ന് കോന്നി എം.എല്.എ ഉറപ്പ് നല്കിയിട്ടും അതൊക്കെ ജലരേഖയായി മാറി. പാലത്തിന് ബാലക്ഷയവുമുണ്ടെന്ന് നാട്ടുകാര് പറയുന്നു. ഫാക്ടറിപടിയില് പുതിയ പാലം നിര്മ്മിക്കണമെന്ന ജനങ്ങളുടെ ആവശ്യം ഇനിയെങ്കിലും നടപ്പാകണമെന്നാണ് പ്രദേശവാസികള് ആവശ്യപ്പെടുന്നത്.
