പത്തനംതിട്ട : കേരള നിയമസഭയുടെ പരിസ്ഥിതി സംബന്ധിച്ച സമിതി സെപ്റ്റംബര് എട്ടിന് ചൊവ്വാഴ്ച പത്തനംതിട്ട ജില്ലയില് സന്ദര്ശനം നടത്തുന്നു. നിയമസഭ പരിസ്ഥിതി സമിതി ചെയര്മാന് സജീവ് ജോസഫ് എം.എല്.എയുടെ നേതൃത്വത്തില് ജില്ലയില് എത്തുന്ന നിയമസഭാംഗങ്ങളുടെ സംഘം രാവിലെ 10 ന് പത്തനംതിട്ട കളക്ടറേറ്റ് കോമ്പൗണ്ടിലുള്ള ആസൂത്രണസമിതി സെക്രട്ടറിയേറ്റ് കോണ്ഫറന്സ് ഹാളില് യോഗം ചേരും. ജില്ലയിലെ കാലവര്ഷക്കെടുതികളുടെ പശ്ചാത്തലത്തില് ബന്ധപ്പെട്ട വകുപ്പുകളുടെ ജില്ലാതല ഉദ്യോഗസ്ഥര്, പരിസ്ഥിതി പ്രവര്ത്തകര്, പൊതുജനങ്ങള് എന്നിവരില് നിന്നും തെളിവെടുപ്പ് നടത്തും.
തുടര്ന്ന് വ്യക്തികളില് നിന്നും സംഘടനകളില് നിന്നും പരാതികള് സ്വീകരിക്കും. അതിനുശേഷം ജില്ലയിലെ പ്രളയബാധിത പ്രദേശങ്ങള് സന്ദര്ശിക്കും. കോന്നി താലൂക്കിലെ കൂടല്, വന്യജീവി ആക്രമണം നടന്ന കുളത്തുമണ്, റാന്നി ഇട്ടിയപ്പാറ ബസ്റ്റാന്ഡ്, റാന്നിയിലെ നാശനഷ്ടം സംഭവിച്ച വ്യാപാര സ്ഥാപനങ്ങള്, തിരുവല്ല, കുറ്റൂര് ഗ്രാമപഞ്ചായത്തുകളിലെ കൃഷിനാശം സംഭവിച്ച സ്ഥലങ്ങള്, കടപ്ര, നിരണം പഞ്ചായത്തുകള് തുടങ്ങിയ സ്ഥലങ്ങള് സന്ദര്ശിക്കുന്ന സമിതി ഇവിടെ നിന്നും തെളിവെടുപ്പ് നടത്തും.
