കോഴഞ്ചേരി : പുല്ലാട് എസ്.ബി.ഐ ബാങ്കിന് സമീപം ജപ്പാന് കുടിവെള്ള പദ്ധതിയുടെ പൈപ്പ് ലൈന് സ്ഥാപിക്കുന്നതിന്റെ ഭാഗമായി നിര്മ്മിച്ച കുഴി അപകട ഭീഷണിയാകുന്നു. കുടിവെള്ള പദ്ധതിയുടെ ഭാഗമായി പൈപ്പ് സ്ഥാപിച്ച ശേഷം കോണ്ക്രീറ്റ് ചെയ്യുന്നതിനായി വീണ്ടും കുഴി എടുത്തെങ്കിലും ഇത് മൂടാത്തതാണ് അപകട ഭീഷണിയായി മാറുന്നത്. 11 കെ.വി ലൈന് കടന്നു പോകുന്ന ട്രാന്സ്ഫോര്മറിന്റെ തൂണിനോട് ചേര്ന്നാണ് കുഴി നിര്മ്മിച്ചിരിക്കുന്നത് എന്നതിനാല് തന്നെ ഇത് ട്രാന്സ്ഫോര്മറിനും ഭീഷണിയായി മാറിയിട്ടുണ്ട്.
കാല്നട യാത്രക്കാര്ക്കും ഇരുചക്ര വാഹനയാത്രക്കാര്ക്കുമാണ് കുഴി ഏറ്റവും കൂടുതല് അപകട ഭീഷണിയായി മാറുന്നത്. രാത്രി സമയങ്ങളില് ഇരുചക്ര വാഹന യാത്രക്കാര് ഇത് ശ്രദ്ധിക്കാതെ അപകടത്തില്പ്പെടുവാനുള്ള സാധ്യത വളരെ കൂടുതലാണ്. കോഴഞ്ചേരി, പുല്ലാട് ഭാഗങ്ങളില് കേരള വാട്ടര് അതോറിട്ടി പൈപ്പ് ലൈന് സ്ഥാപിക്കാന് എടുക്കുന്ന കുഴികള് പലപ്പോഴും പൂര്ണ്ണമായി മൂടാത്തതിനാല് വലിയ അപകട സാധ്യത നിലനില്ക്കുന്നതായും ആക്ഷേപമുയരുന്നു.
