കോഴിക്കോട്: നഗരത്തിലെ ഹോട്ടലില് മോഷണം നടത്തി മുങ്ങിയ തട്ടുദോശ വിദഗ്ധനായ പ്രതിയെ തമിഴ്നാട്ടിലെ തിരുവാരൂരില് നിന്ന് അതിസാഹസികമായി പോലിസ് പിടികൂടി. 41കാരനായ ഭാഗ്യരാജാണ് അറസ്റ്റിലായത്. പ്രതിയെ കോടതിയില് ഹാജരാക്കി റിമാന്ഡ് ചെയ്തു. മേയ് 27നായിരുന്ന മോഷണം. പണം നഷ്ടപ്പെട്ടതിനെ തുടര്ന്ന് നടത്തിയ പരിശോധനയിലാണ് സിസിടിവി ദൃശ്യങ്ങളില് മോഷ്ടാവിനെ കണ്ടത്. കൂടുതല് പരിശോധനയില് ആളെ മനസിലായി. മൊബൈല് ലൊക്കേഷന് കേന്ദ്രീകരിച്ച് നടത്തിയ തിരച്ചിലില് തമിഴ്നാട്ടിലെ തിരുവാരൂരിലെ ഉള്ഗ്രാമത്തില് നിന്ന് പ്രതിയെ അറസ്റ്റുചെയ്തു.
41കാരനായ ഭാഗ്യരാജ് തട്ടുദോശയുണ്ടാക്കുന്നതില് അതിവിദഗ്ധനായിരുന്നു. അതിനാല് തന്നെ ഹോട്ടലുകള് കേന്ദ്രീകരിച്ചാണ് ജോലി ചെയ്തിരുന്നത്. കുറച്ചുമാസങ്ങള്ക്ക് മുമ്പാണ് മിംസ് ആശുപത്രിക്ക് സമീപമുള്ള ശ്രീലക്ഷ്മി ഹോട്ടലില് ഭാഗ്യരാജ് ജോലിക്കെത്തിയത്. വൈകാതെ ആ ജോലി വിട്ടു. ഇതിനോടകം അവിടുത്തെ കാര്യങ്ങളെല്ലാം മനസിലാക്കിയ ഭാഗ്യരാജ് ആഴ്ച്ചകള്ക്ക് ശേഷം അതേഹോട്ടല് മോഷണത്തിനായി തിരഞ്ഞെടുത്തു. പിന്വാതില് പൊളിച്ച് അകത്ത് കയറി തൊഴിലാളികള്ക്ക് ശമ്പളം നല്കാനായി മാറ്റിവച്ച തുക കവര്ന്നശേഷം സ്ഥലം വിട്ടു.
തമിഴ്നാട് സ്വദേശിയായിരുന്ന ഭാഗ്യരാജ് ഏറെ നാളായി വയനാട്ടിലായിരുന്നു താമസം. എന്നാല് മോഷണശേഷം ഭാഗ്യരാജ് പോയത് തിരുവാരൂരിലെ സ്വന്തം ഗ്രാമത്തിലേയ്ക്ക്. അവിടെ സ്വസ്ഥമായി കഴിയുന്നതിനിടെയാണ് കേരള പോലിസ് എത്തി കസ്റ്റ്ഡിയില് എടുത്തത്. ആദ്യം കുറ്റം നിഷേധിച്ചെങ്കിലും സിസിടിവി അടക്കമുള്ള തെളിവുകള് നിരത്തിയതോടെ കുറ്റം സമ്മതിച്ചു. റിമാന്ഡിലായ പ്രതിയെ കൂടുതല് ചോദ്യം ചെയ്യാനായി ഉടന് കസ്റ്റഡിയില് വാങ്ങുമെന്ന് അന്വേഷണസംഘം അറിയിച്ചു.
