തൃശൂരില്‍ മൊബൈല്‍ ഷോപ്പ് കുത്തിത്തുറന്ന് കവര്‍ച്ച : പത്ത് ലക്ഷത്തോളം രൂപയുടെ മൊബൈല്‍ ഫോണുകള്‍ നഷ്ടപ്പെട്ടു

തൃശ്ശൂര്‍ : തൃശൂരില്‍ മൊബൈല്‍ ഷോപ്പ് കുത്തിത്തുറന്ന് കവര്‍ച്ച. പത്ത് ലക്ഷത്തോളം രൂപ വിലയുള്ള മൊബൈല്‍ ഫോണുകള്‍ നഷ്ടപ്പെട്ടു. ലോകമലേശ്വരം സ്വദേശി ചെട്ടിയാട്ടില്‍ സംഗീതിന്‍റെ ഉടമസ്ഥതയില്‍ ഉള്ള പെന്‍റ് മൊബൈല്‍സിലാണ് കവര്‍ച്ച. രാവിലെ സ്ഥാപനം തുറക്കാനെത്തിയപ്പോഴാണ് മോഷണവിവരം അറിഞ്ഞത്. സ്ഥാപനത്തിന്‍റെ ഗ്ലാസ് ഡോറിലെയും, ഷട്ടറിലെയും താഴുകള്‍ അറുത്തുമാറ്റിയാണ് മോഷ്ടാവ് അകത്തു കയറിയത്. ഷെല്‍ഫില്‍ സൂക്ഷിച്ചിരുന്ന വില പിടിപ്പുള്ള മൊബൈല്‍ ഫോണുകളാണ് നഷ്ടപ്പെട്ടിട്ടുള്ളത്. സ്ഥാപനത്തിലെ സിസിടിവി ക്യാമറയുടെ ഹാര്‍ഡ്‌ ഡിസ്ക്കും കവര്‍ന്നിട്ടുണ്ട്. കൊടുങ്ങല്ലൂര്‍ പോലീസ് അന്വേഷണമാരംഭിച്ചു.