കണ്ണൂര്: വിമാനത്തില് മുഖ്യമന്ത്രിക്കെതിരെ പ്രതിഷേധിച്ച യൂത്ത് കോണ്ഗ്രസ് നേതാക്കളെ ഭീഷണിപ്പെടുത്തുന്നതായി പരാതി. അക്രമിക്കുമെന്നും കൊലപ്പെടുത്തുമെന്നും ഫോണിലൂടെ വിളിച്ചും സോഷ്യല് മീഡിയ വഴിയും ഭീഷണിപ്പെടുത്തുന്നതായാണ് യൂത്ത് കോണ്ഗ്രസ് നേതാക്കള് പരാതി നല്കിയിരിക്കുന്നത്.മുഖ്യമന്ത്രിക്കെതിരെ പ്രതിഷേധിച്ച ഫര്സീന് മജീദും നവീന് കുമാറും ഇത് കാണിച്ച് കണ്ണൂര് എസ് പിക്കാണ് പരാതി നല്കിയത്. കോടതി ജാമ്യം നല്കി ജയില് മോചിതരായി കണ്ണൂരില് എത്തിയതിന് ശേഷമാണ് വ്യാപകമായി ഭീഷണി സന്ദേശങ്ങള് വരുന്നതെന്ന് ഇരുവരും പരാതിയില് പറയുന്നു. സംഭവം നടന്ന അന്ന് മുതല് ഇരുവര്ക്കും പോലീസ് സംരക്ഷണം നല്കുന്നുണ്ട്.
കണ്ണൂരില് നിന്നും തിരുവനന്തപുരത്തേക്കുള്ള വിമാന യാത്രയില് മുഖ്യമന്ത്രിക്കെതിരെ യൂത്ത് കോണ്ഗ്രസ് പ്രവര്ത്തകര് പ്രതിഷേധിച്ചത് വന് വിവാദമായിരുന്നു. കേസില് അറസ്റ്റിലായ ഒന്നാം പ്രതി ഫര്സീന് മജീദിനും രണ്ടാം പ്രതി ആര് കെ നവീന്കുമാറിനും കോടതി ജാമ്യം അനുവദിചക്കുകയും ചെയ്തിരുന്നു. മൂന്നാം പ്രതി സുജിത് നാരായണന് കോടതി മുന്കൂര് ജാമ്യവും അനുവദിച്ചിരുന്നു.
മുഖ്യമന്ത്രിക്കെതിരെ പ്രതികള്ക്കുണ്ടായിരുന്നത് രാഷ്ട്രീയ വിരോധം മാത്രമാണെന്നും ആയുധവുമായല്ല വിമാനത്തില് കയറിയതെന്നും വിലയിരുത്തിയാണ് കോടതി മൂന്നുപേര്ക്കും ജാമ്യം അനുവദിച്ചത്. പ്രതിഷേധം ഗൂഡാലോചനയുടെ ഭാഗമായിരുന്നില്ലെന്നും പെട്ടെന്ന് തീരുമാനിച്ചതാണെന്നും ജാമ്യത്തിലിറങ്ങിയ യൂത്ത് കോണ്ഗ്രസ് പ്രവര്ത്തകര് പറഞ്ഞിരുന്നു. എന്നാല് കേസ് അന്വേഷണം ശക്തമായി മുന്നോട്ട് കൊണ്ടുപോകുമെന്നാണ് പ്രത്യേക അന്വേഷണം സംഘം അറിയിക്കുന്നത്.
മുഖ്യമന്ത്രി സഞ്ചരിച്ച വിമാനത്തില് സഞ്ചരിക്കാന് അവസാന നിമിഷം ഒന്നാം പ്രതി ഫര്സീന് മജീദ് മൂന്ന് ടിക്കറ്റെടുത്തത് ഗൂഢാലോചനയുടെ തെളിവാണെന്നാണ് പോലീസ് നിലപാട്. 23 മിനിറ്റ് പ്രതികള് വീമാനത്താവളത്തില് ഗൂഢാലോചന നടത്തിയെന്നതിന് തെളിവുണ്ടെന്നും അന്വേഷണ സംഘം പറയുന്നു. മുഖ്യമന്ത്രിയുടെ അടുത്തേക്ക് പാഞ്ഞടുത്തു എന്നതിന് സാക്ഷിമൊഴികളുണ്ട്. എന്നാല് ഇന്ഡിഗോ നടത്തുന്ന ആഭ്യന്തര അന്വേഷണ റിപ്പോര്ട്ട് പോലീസ് റിപ്പോര്ട്ടിന് എതിരാണെങ്കില് അത് കേസിനെ ദുര്ബലപ്പെടുത്തും.
സാക്ഷി മൊഴികളിലും സാഹചര്യ തെളിവുകളിലും മാത്രമാണ് വധശ്രമക്കേസ് നില്ക്കുന്നത്. ഇത് അന്വേഷണ സംഘത്തിന് മുന്നിലെ വെല്ലുവിളിയാണ്. തിരുവനന്തപുരം സെഷന്സ് കോടതിയിലാണ് വധശ്രമക്കേസ് പരിഗണിക്കുന്നത്. ഏവിയേഷന് വകുപ്പുകള് ചുമത്തിയിട്ടുള്ള കേസായതിനാല് എന്ഐഎ കോടതി പോലെ ഒരു പ്രത്യേക കോടതിയിലേക്ക് തുടര് വിചാരണകള് മാറ്റാണമെന്ന ആവശ്യവുമായി കേന്ദ്ര സര്ക്കാരിനെ പോലീസ് സമീപിക്കാനും നീക്കമുണ്ട്.
