ചണ്ഡീഗഡ് : ഹരിയാനയിലെ ഝജ്ജറില് നിയന്ത്രണം വിട്ട ട്രക്ക് റോഡരികില് കിടന്നുറങ്ങിയ കുടിയേറ്റ തൊഴിലാളികള് ക്കുമേല് ഇടിച്ചുകയറി മൂന്ന് മരണം. കുണ്ഡ്ലി – മനേസര് – പല്വാല് എക്സ്പ്രസ് വേയില് ആശോദ്ധ ടോള് പ്ലാസയില് നിന്ന് രണ്ടു കിലോമീറ്റര് അകലെയാണ് സംഭവം. നിര്മാണ തൊഴിലാളികളാണ് മരിച്ചത്. എക്സപ്രസ് വേ റോഡരികില് നിര്മാണ തൊഴിലാളികളായ 18 ഓളം പേര് കിടന്നുറങ്ങുന്നതിനിടയിലേക്കാണ് നിയന്ത്രണം വിട്ട ട്രക്ക് ഇടിച്ചു കയറിയത്.
തൊഴിലാളികള് സംഭവസ്ഥലത്തു തന്നെ മരിച്ചുവെന്ന് മുതിര്ന്ന പൊലീസ് ഉദ്യോഗസ്ഥന് അമിത് യാശ്വര്ധന് പറഞ്ഞു. 12 പേരെ ആശുപത്രിയില് പ്രവേശിപ്പിച്ചിട്ടുണ്ട്. അതില് പത്ത് പേരെ റോഹ്ത്തഗിലെ ആശുപത്രിയിലേക്ക് മാറ്റി. പാലം നിര്മാണവുമായി ബന്ധപ്പെട്ടാണ് തൊഴിലാളികള് ഹരിയാനയില് എത്തിയത്. മരിച്ചവരെ ഇതുവരെ തിരിച്ചറിഞ്ഞിട്ടില്ല. ഇവര് ഉത്തര് പ്രദേശിലെ രണ്ടു ജില്ലകളില് നിന്നുള്ളവരാണെന്നും പൊലീസ് ഓഫീസര് അറിയിച്ചു.
സംഭവം നടന്നയുടന് ട്രക്ക് ഡ്രൈവര് ഓടി രക്ഷപ്പെട്ടു. ട്രക്ക് ഉടമയെ പൊലീസ് ബന്ധപ്പെട്ടിട്ടുണ്ട്. രണ്ട് ഡ്രൈവര്മാരും ഒരു സഹായിയും ട്രക്കിലുണ്ടായിരുന്നെന്ന് ഉടമ മൊഴി നല്കി. ഡ്രൈവര്മാരുടെ പേരുവിവരങ്ങള് അറിയാമെന്നും ഉടനെ അറസ്റ്റ് ചെയ്യുമെന്നും പോലീസ് വ്യക്തമാക്കി.തൊഴിലാളികള് കിടന്നുറങ്ങുന്നതിന് സമീപം ബാരിക്കേഡുകളും വാഹനങ്ങള്ക്ക് തിരിച്ചറിയാനായി റിഫ്ലക്ടറുകളും സ്ഥാപിച്ചിരുന്നു. ഡ്രൈവര് ലഹരി ഉപയോഗിച്ചതോ ഉറങ്ങിയതോ ആകാം വാഹനത്തിന്റെ നിയന്ത്രണം നഷ്ടപ്പെടാനിടയാക്കിയതെന്നും പോലീസ് പറഞ്ഞു.
