ചിറ്റാര് : ചിറ്റാര് കട്ടച്ചിറയില് അജ്ഞാത ജീവി ആടിനെ പിടിച്ചു. കഴിഞ്ഞ രാത്രിയിലാണ് കട്ടച്ചിറ വയലില് വടക്കേക്കര വീട്ടില് രാജമ്മയുടെ ആടിനെ അജ്ഞാത ജീവി പിടിച്ചത്. അഞ്ച് ആടുകളെ ആയിരുന്നു വീടിന് സമീപത്തെ കൂട്ടില് കെട്ടിയിരുന്നത്. ഇതില് ഒന്നിനെ കൂട്ടില് കയറി പിടിക്കുകയായിരുന്നു. രാത്രിയില് ആട് കരയുന്ന ശബ്ദം കേട്ട് വീട്ടുകാര് വീടിന് വെളിയില് ഇറങ്ങി നോക്കിയെങ്കിലും എന്ത് ജീവിയാണ് ആക്രമിച്ചതെന്ന് കണ്ടെത്താന് കഴിഞ്ഞില്ല. അപ്പോഴേക്കും ആടിന്റെ ജഡം അജ്ഞാത ജീവി കടിച്ചെടുത്ത് കാട്ടിലേക്ക് മറഞ്ഞിരുന്നു.
വീടിന് സമീപത്തെ കാട് പിടിച്ചു കിടക്കുന്ന പറമ്പിലൂടെ ആടിനെ വലിച്ചിഴച്ച് കൊണ്ടുപോയിരിക്കുന്നതും കാണാന് കഴിയും. ചിറ്റാര് ഫോറസ്റ്റ് ഡെപ്യൂട്ടി റെയ്ഞ്ച് ഓഫീസറുടെ നേതൃത്വത്തില് സ്ഥലത്ത് പരിശോധന നടത്തി നിരീക്ഷണ ക്യാമറകള് സ്ഥാപിച്ചു. പ്രദേശത്ത് കഴിഞ്ഞ കുറച്ചു കാലങ്ങളായി വന്യജീവി ആക്രമണം വര്ധിച്ചുവരികയാണെന്നും വനം വകുപ്പ് അധികൃതര് വിഷയത്തില് നടപടി സ്വീകരിക്കണം എന്നും പ്രദേശവാസികള് ആവശ്യപ്പെട്ടു.
