ലക്നൗ: ഉത്തര്പ്രദേശിലെ ഗോണ്ട ജില്ലയില് ചൊവ്വാഴ്ച രാത്രി ഉണ്ടായ സ്ഫോടനത്തില് 5 നും 12 നും ഇടയില് പ്രായമുള്ള മൂന്ന് കുട്ടികള് ഉള്പ്പെടെ 7 പേര് കൊല്ലപ്പെടുകയും ഏഴ് പേര്ക്ക് ഗുരുതരമായി പരിക്കേല്ക്കുകയും ചെയ്തു. പാചക വാതക സിലിണ്ടര് പൊട്ടിത്തെറിച്ചാണ് അപകടം ഉണ്ടായതെന്നാണ് പ്രാഥമിക നിഗമനം. കൃത്യമായ കാരണം കണ്ടെത്താന് കൂടുതല് അന്വേഷണം തുടരുകയാണ്.
മരണത്തില് ദു:ഖം പ്രകടിപ്പിച്ച മുഖ്യമന്ത്രി യോഗി ആദിത്യനാഥ് പരിക്കേറ്റവര്ക്ക് ഏറ്റവും മികച്ച ചികിത്സ ഉറപ്പുവരുത്താനും മരിച്ചവരുടെ കുടുംബത്തിന് സഹായം നല്കാനും ഉദ്യോഗസ്ഥരോട് നിര്ദ്ദേശിച്ചു.
സ്ഫോടനത്തിന്റെ കാരണം കണ്ടെത്താന് സമഗ്രമായ അന്വേഷണം നടത്തണമെന്നും അദ്ദേഹം ആവശ്യപ്പെട്ടു. ചൊവ്വാഴ്ച രാത്രി 11.30 ഓടെ വസിര്ഗഞ്ച് പോലീസ് സ്റ്റേഷന് പരിധിയിലുള്ള തഥേര്കപൂര്വ പ്രദേശത്താണ് സംഭവം നടന്നതെന്ന് ഗോണ്ട പോലീസ് മേധാവി (എസ്പി) സന്തോഷ് കുമാര് മിശ്ര പറഞ്ഞു.
സ്ഫോടനത്തിന്റെ ശബ്ദം കേട്ട് നാട്ടുകാര് വീടുകളില് നിന്ന് ഓടിപ്പോയി. രക്ഷപെട്ടവരെയും മൃതദേഹങ്ങളെയും അവശിഷ്ടങ്ങള്ക്കടിയില് നിന്ന് പുറത്തെടുത്തു. ഏഴുപേര് മരിച്ചു, മറ്റ് ഏഴ് പേര് ചികിത്സയിലാണ്. സ്ഥലത്ത് സമഗ്രമായി പരിശോധിച്ച് റിപ്പോര്ട്ട് നല്കാന് ഫോറന്സിക് വിദഗ്ധരെയും ബോംബ് സ്ക്വാഡിനെയും നിയോഗിച്ചിട്ടുണ്ടെന്ന് എസ്പി പറഞ്ഞു.
