കോട്ടാങ്ങൽ കരയുടെ വേലകളി അഭ്യസനം ആരംഭിച്ചു

കോട്ടാങ്ങൽ: ശ്രീ ഭദ്ര പടയണി സംഘത്തിന്റെ ആഭിമുഖ്യത്തിൽ കോട്ടാങ്ങൽ കരയുടെ വേലകളി അഭ്യസനം പുളിക്കൽ കളരിയിൽ ആരംഭിച്ചു. അൻപതോളം കൊച്ചു കുരുന്നുകളാണ് വേലകളി അഭ്യസനത്തിന് ആശാൻമാർക്ക് ദക്ഷിണ വെച്ചത്. വല്യ പടയണിയോടനുബന്ധിച്ച് സർവ ആഭരണ വിഭൂഷിതരായി, വാളും പരിചയും ഏന്തി, തപ്പു , ചെണ്ട, കൈ മണി എന്നീ വാധ്യങ്ങളുടെ അകമ്പടിയോടെ കുട്ടികൾ നടത്തുന്ന വേലകളി ജഗദംബികയായ കോട്ടാങ്ങൽ അമ്മക്ക് ഏറ്റവും ഇഷ്ടപ്പെട്ട ചടങ്ങ് എന്ന് കരക്കാർ വിശ്വസിക്കുന്നു. കരയുടെ വിവിധ പ്രദേശങ്ങളിൽപ്പെട്ട കൊച്ചു കുരുന്നുകൾ തദ്ദേശീയരായ ആശാന്മാരുടെ കീഴിൽ അഭ്യസിച്ചു തുള്ളുന്നു എന്നത് സവിശേഷതയാണ്. കൊടൂർ കെ.ആർ കൃഷ്ണപ്രസാദ് ആശാൻ, മഠത്തിൽ സുരേന്ദ്രൻ നായർ ആശാൻ എന്നിവരുടെ ശിക്ഷണത്തിലാണ് കുട്ടികൾ വേലകളി അഭ്യസിക്കുന്നത്.