തൃശ്ശൂര്: പുത്തൂരില് വനിതാ വില്ലേജ് ഓഫീസര് കൈ ഞരമ്പ് മുറിച്ച സംഭവത്തില് പഞ്ചായത്ത് പ്രസിഡന്റ് ഉള്പ്പെടെ എട്ടു പേര്ക്കെതിരെ ജാമ്യമില്ലാ വകുപ്പ് പ്രകാരം കേസ്. വില്ലേജ് ഓഫീസറുടെ കൃത്യനിര്വഹണം തടസ്സപ്പെടുത്തിയതിനാണ് കേസ്.
പുത്തൂര് വില്ലേജ് ഓഫീസറായ സിനിയാണ് ഓഫീസില് വെച്ച് കൈ ഞരമ്പ് മുറിച്ച് ആത്മഹത്യക്ക് ശ്രമിച്ചത്. ഇന്നലെ വൈകീട്ടായിരുന്നു സംഭവം. ലൈഫ് മിഷന് പദ്ധതിക്ക് ആവശ്യമായ രേഖകള് നല്കാത്തതില് പ്രതിഷേധിച്ച് പഞ്ചായത്ത് പ്രസിഡന്റ് ഉള്പ്പെടെയുള്ളവര് ഇന്നലെ വില്ലേജ് ഓഫീസറെ തടഞ്ഞ് വെച്ചിരുന്നു. പ്രസിഡന്റിന്റെ നേതൃത്വത്തില് പ്രതിഷേധവും നടത്തി. അതിനിടയിലാണ് വില്ലേജ് ഓഫീസറുടെ ആത്മഹത്യാശ്രമമുണ്ടായത്. നാട്ടുകാരും പോലീസും ചേര്ന്നാണ് സിനിയെ ആശുപത്രിയിലെത്തിച്ചത്.
