ചെറുവത്തൂര്‍ : വലിയ ശബ്ദത്തോടെ 10കോല്‍ ആഴമുള്ള ആള്‍മറയുള്ള കിണര്‍ പൂര്‍ണമായും ഭൂമിക്ക് അടിയിലേക്ക് താഴ്ന്നു. പിലിക്കോട് പഞ്ചായത്ത് ഓഫിസിനു സമീപത്തെ പി.വി.കുഞ്ഞഹമ്മദിന്റെ വീട്ടിലാണ് സംഭവം. വീടിന്റെ വര്‍ക്ക് ഏരിയയ്ക്ക് സമീപത്ത് നിന്ന് വലിയ ശബ്ദം കേട്ട് വീട്ടുകാര്‍ നോക്കുമ്പോഴാണ് കിണര്‍ താഴുന്നത് കണ്ടത്.
കിണര്‍ താഴുന്ന സമയത്തുണ്ടായ ശബ്ദം കേട്ട് ഇവിടെ പറമ്പില്‍ പണിയെടുക്കുന്ന തൊഴിലാളികള്‍ ഓടി രക്ഷപ്പെട്ടു. അപ്പോള്‍ കിണറിലെ വെള്ളം പതഞ്ഞു പൊങ്ങിയതായും കിണറിലെ വെള്ളത്തിന് നിറമാറ്റം ഉണ്ടായതായും ഇവര്‍ പറഞ്ഞു. സംഭവം അറിഞ്ഞ് തൃക്കരിപ്പൂരില്‍ നിന്ന് ഗ്രേഡ് അസിസ്റ്റന്റ് സ്റ്റേഷന്‍ ഓഫിസര്‍ സി.ഭാസ്കരന്റെ നേതൃത്വത്തില്‍ എത്തിയ അഗ്നിരക്ഷാ സേന വീട്ടുകാരോട് മാറി താമസിക്കാന്‍ നിര്‍ദേശം നല്‍കിയിട്ടുണ്ട്. താഴ്ന്ന കിണറിന് സമീപത്തായി ഒരു കുഴി രൂപപ്പെട്ടിട്ടുണ്ട്.
