മാനന്തവാടി: ചികിത്സാ പിഴവിനെ തുടര്ന്ന് വയനാട് മെഡിക്കല് കോളജില് വീണ്ടും രോഗി മരിച്ചെന്ന് ആരോപണം. തരുവണ വിയ്യൂര്കുന്ന് കോളനിയിലെ രാമനാണ് മരിച്ചത്. ദേഹാസ്വാസ്ഥ്യവും ഛര്ദിയും അനുഭവപ്പെട്ടതിനെ തുടര്ന്ന് ഇന്നലെ രാവിലെയാണ് തരുവണ സ്വദേശി രാമനെ ആശുപത്രിയില് പ്രവേശിപ്പിച്ചത്. സ്കാനിംഗില് രക്തം കട്ടപിടിച്ചതായി കണ്ടെത്തിയിട്ടും വിദഗ്ധ ചികിത്സ നല്കുകയോ ഐസിയുവില് പ്രവേശിപ്പിക്കുകയോ ചെയ്യാതെ രോഗിയെ വാര്ഡിലേക്ക് മാറ്റിയെന്ന് ബന്ധുക്കള് ആരോപിച്ചു. വൈകുന്നേരം ഏഴ് മണിയോടെ അസുഖം മൂര്ച്ഛിച്ചിട്ടും ഡോക്ടര് എത്താന് വൈകിയതും മരണകാരണമായെന്ന് ബന്ധുക്കള് ആരോപിച്ചു.
അതേസമയം ദൃതദേഹത്തോട് മെഡിക്കല് കോളജ് അധികൃതര് അനാദരവ് കാട്ടിയതായും ആരോപണമുണ്ട്. പോസ്റ്റ്മോര്ട്ടത്തിനായി മൃതദേഹം മോര്ച്ചറിയിലേക്ക് മാറ്റാന് തീരുമാനിച്ചെങ്കിലും മോര്ച്ചറിക്ക് പുറത്ത് അര മണിക്കൂറോളം മൃതദേഹം വെച്ചതും വാക്കേറ്റത്തിനടയാക്കി. സംഭവത്തില് അന്വേഷണം ആരംഭിച്ചിട്ടുണ്ട്.
