മുംബൈ: അലഞ്ഞുതിരിയുന്ന മൃഗങ്ങള് നമ്മുടെ സമൂഹത്തിന്റെ ഭാഗമാണെന്നും അവയെ പരിപാലിക്കണമെന്നും ബോംബെ ഹൈക്കോടതി. തെരുവു നായ്ക്കളോട് വെറുപ്പോടെയും ക്രൂരതയോടെയും പെരുമാറുന്നത് പരിഷ്കൃത സമൂഹത്തിനു യോജിച്ച നടപടിയല്ലെന്ന് ബോംബെ ഹൈക്കോടതി വ്യക്തമാക്കി. തെരുവുനായ്ക്കള്ക്കു തീറ്റ കൊടുക്കുന്നതിനെ എതിര്ത്ത അപ്പാര്ട്ട്മെന്റ് സൊസൈറ്റിക്കെതിരെ താമസക്കാരി നല്കിയ ഹര്ജി പരിഗണിക്കുകയായിരുന്നു കോടതി.
കോടതി വളപ്പില് തന്നെ ഒട്ടേറെ നായ്ക്കളും പൂച്ചകളും ഉണ്ടെന്ന് ബെഞ്ച് ചൂണ്ടിക്കാട്ടി. പൂച്ചകള് ചിലപ്പോഴൊക്കെ ഡയസില് തന്നെ വന്നിരിക്കാറുണ്ട്. അവയെ എവിടെ കൊണ്ടു കളഞ്ഞാലും തിരിച്ചുവരും. ഈ മൃഗങ്ങളും ജീവികളാണ്, സമൂഹത്തിന്റെ ഭാഗമാണ്. അവയെ നമ്മള് സംരക്ഷിക്കേണ്ടതുണ്ട്- കോടതി പറഞ്ഞു. തെരുവു നായ്ക്കളെ വെറുക്കുന്നതും അവയോടു ക്രൂരതയോടെ പെരുമാറുന്നതും സ്വീകാര്യമായ സമീപനമല്ല. പരിഷ്കൃതമായ സമൂഹത്തിനു യോജിച്ച നടപടിയല്ല അത്. മൃഗങ്ങളോടുള്ള ക്രൂരത ഭരണഘടനാ മൂല്യങ്ങള്ക്കും നിയമത്തിനും എതിരാണെന്ന് കോടതി ചൂണ്ടിക്കാട്ടി.
