പത്തനംതിട്ട : ഇടിമിന്നലിനും ശക്തമായ കാറ്റിനും സാധ്യതയുള്ളതിനാല് ജനങ്ങള് ജാഗ്രത പുലര്ത്തണമെന്ന് ദുരന്ത നിവാരണ അതോറിറ്റി അറിയിച്ചു. മേയ് മൂന്നുവരെ സംസ്ഥാനത്ത് ശക്തമായ മഴയ്ക്കും കാറ്റിനും ഇടിമിന്നലിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
ശക്തമായ കാറ്റിനെ നേരിടാനുള്ള ജാഗ്രത നിര്ദേശങ്ങള്:
കാറ്റും മഴയും ഉണ്ടാകുമ്പോള് മരങ്ങളുടെ ചുവട്ടില് നില്ക്കാന് പാടുള്ളതല്ല. മരച്ചുവട്ടില് വാഹനങ്ങളും പാര്ക്ക് ചെയ്യരുത്. വീടിന്റെ ടെറസിലും നില്ക്കുന്നത് ഒഴിവാക്കണം.
ഉറപ്പില്ലാത്ത പരസ്യ ബോര്ഡുകള്, വൈദ്യുതി പോസ്റ്റുകള്, കൊടിമരങ്ങള് തുടങ്ങിയവ ശരിയായ രീതിയില് ബലപ്പെടുത്തുകയോ അഴിച്ചുവയ്ക്കുകയോ ചെയ്യുക. മഴയും കാറ്റുമുള്ളപ്പോള് ഇതിന്റെ ചുവട്ടിലും സമീപത്തും നില്ക്കുകയോ വാഹനങ്ങള് പാര്ക്ക് ചെയ്യാനോ പാടില്ല.
ഓല മേഞ്ഞതോ, ഷീറ്റ് പാകിയതോ, അടച്ചുറപ്പില്ലാത്തതോ ആയ വീടുകളില് താമസിക്കുന്നവര് അധികൃതരുമായി (1077 എന്ന നമ്പറില്) മുന്കൂട്ടി തന്നെ ബന്ധപ്പെടുകയും മുന്നറിയിപ്പ് വരുന്ന ഘട്ടങ്ങളില് അവര് ആവശ്യപ്പെടുന്ന മുറയ്ക്ക് സുരക്ഷിതമായ കെട്ടിടങ്ങളിലേക്കു മാറിത്താമസിക്കണം. തദ്ദേശ സ്ഥാപനതല ദുരന്ത ലഘൂകരണ പദ്ധതി പ്രകാരം കണ്ടെത്തിയിട്ടുള്ള ഇത്തരം ആളുകളെ കോവിഡ് 19 പ്രോട്ടോക്കോള് അനുസരിച്ച് റിലീഫ് ക്യാമ്പുകളിലേക്ക് ആവശ്യമുള്ള ഘട്ടങ്ങളില് മാറ്റാന് തദ്ദേശ സ്വയംഭരണ സ്ഥാപനങ്ങളും റവന്യൂ ഉദ്യോഗസ്ഥരും ജനപ്രതിനിധികളും മുന്കൈ എടുക്കണം.
കാറ്റ് വീശി തുടങ്ങുമ്പോള്തന്നെ വീടുകളിലെ ജനലുകളും വാതിലുകളും അടച്ചിടണം. ജനലുകളുടെയും വാതിലുകളുടെയും സമീപത്ത് നില്ക്കരുത്. ചുമരിലോ മറ്റോ ചാരിവച്ചിട്ടുള്ള കോണി പോലെയുള്ള കാറ്റില് വീണുപോകാന് സാധ്യതയുള്ള ഉപകരണങ്ങളും മറ്റു വസ്തുക്കളും കയറുപയോഗിച്ച് കെട്ടി വയ്ക്കണം.
കാറ്റും മഴയും ശക്തമാകുമ്പോള് വൈദ്യുതി കമ്പികളും പോസ്റ്റുകളും പൊട്ടിവീഴാനുള്ള സാധ്യത കൂടുതലാണ്. ഇത്തരത്തില് ഏതെങ്കിലും അപകടം ശ്രദ്ധയില്പ്പെട്ടാല് ഉടനെ തന്നെ കെഎസ്ഇബിയുടെ 1912 എന്ന കണ്ട്രോള് റൂമിലോ 1077 എന്ന നമ്പറില് ജില്ലാ ദുരന്തനിവാരണ അതോറിറ്റിയുടെ കണ്ട്രോള് റൂമിലോ വിവരം അറിയിക്കണം. തകരാര് പരിഹരിക്കുന്ന പ്രവര്ത്തികള് കാറ്റ് തുടരുന്ന ഘട്ടത്തില് ഒഴിവാക്കുകയും കാറ്റും മഴയും അവസാനിച്ച ശേഷംമാത്രം നടത്തുകയും ചെയ്യുക. കെഎസ് ഇ ബി ജീവനക്കാരുമായി പൊതുജനങ്ങള് ക്ഷമയോടെ സഹകരിക്കുക. പൊതുജനങ്ങള് നേരിട്ടിറങ്ങി ഇത്തരം റിപ്പയര് വര്ക്കുകള് ചെയ്യരുത്.
പത്രം-പാല് വിതരണക്കാര് പോലെയുള്ള അതിരാവിലെ ജോലിക്ക് ഇറങ്ങുന്നവര് പ്രത്യേക ജാഗ്രത പാലിക്കണം. വഴികളിലെ വെള്ളക്കെട്ടുകളിലും മറ്റും വൈദ്യുതി ലൈന് പൊട്ടിവീണിട്ടില്ലെന്ന് ഉറപ്പാക്കാന് ശ്രമിക്കണം. എന്തെങ്കിലും അപകടം സംശയിക്കുന്നപക്ഷം കണ്ട്രോള് റൂമില് അറിയിച്ച് അപകടം ഇല്ലെന്ന് ഉറപ്പ് വരുത്തി മാത്രം മുന്നോട്ട് പോകണം.
കൃഷിയിടങ്ങളില് കൂടി കടന്നുപോകുന്ന വൈദ്യുത ലൈനുകള് സുരക്ഷിതമാണെന്ന് പാടത്ത് ഇറങ്ങുന്നതിനു മുന്നേ ഉറപ്പ് വരുത്തുക. നിര്മാണ ജോലികളില് ഏര്പ്പെടുന്നവര് കാറ്റും മഴയും ശക്തമാകുമ്പോള് ജോലി നിര്ത്തിവച്ചു സുരക്ഷിതമായ ഇടത്തേക്കു മാറിനില്ക്കണം. വീട്ട് വളപ്പിലെ മരങ്ങളുടെ അപകടകരമായ രീതിയിലുള്ള ചില്ലകള് വെട്ടിയൊതുക്കണം. അപകടകരമായ അവസ്ഥയിലുള്ള മരങ്ങള് പൊതുഇടങ്ങില് ശ്രദ്ധയില്പ്പെട്ടാല് ബന്ധപ്പെട്ട തദ്ദേശ സ്ഥാപന സെക്രട്ടറിയെ അറിയിക്കണം.
ശക്തമായ ഇടിമിന്നല് വളരെ അപകടകാരിയാണ്. ഇടിമിന്നലുള്ള സമയം സുരക്ഷിതമായി കെട്ടിടത്തിനകത്ത് തന്നെ ഇരിക്കാന് ശ്രദ്ധിക്കണം. സംസ്ഥാന ദുരന്ത നിവാരണ അതോറിറ്റി പുറപ്പെടുവിച്ചിട്ടുള്ള ഇടിമിന്നല് സുരക്ഷാ മുന്കരുതല് നിര്ദേശങ്ങള് കര്ശനമായി പാലിക്കണം. https://sdma.kerala.gov.in എന്ന വെബ്സൈറ്റില് ഇവ ലഭ്യമാണ്.
ഇടിമിന്നല് സാധ്യത മനസ്സിലാക്കാന് കേന്ദ്ര കാലാവസ്ഥ വകുപ്പ് തയാറാക്കിയിട്ടുള്ള ‘ദാമിനി’ മൊബൈല് ആപ്ലിക്കേഷന് ഉപയോഗിക്കാം.
https://play.google.com/store/apps/details?id=com.lightening.live.damini&hl=en_IN എന്ന ലിങ്കില് നിന്ന് ഡൗണ്ലോഡ് ചെയ്ത് ഉപയോഗിക്കാം. അടുത്ത മൂന്നു മണിക്കൂറില് മഴയും ഇടിമിന്നലും ഉണ്ടാകാനിടയുള്ള ജില്ലകളുടെ പ്രവചനം കേന്ദ്ര കാലാവസ്ഥാ വകുപ്പിന്റെ https://www.imdtvm.gov.in/ എന്ന വെബ്സൈറ്റില് കൃത്യമായ ഇടവേളകളില് അപ്ഡേറ്റ് ചെയ്യുന്നത് ശ്രദ്ധിക്കുക. ദുരന്ത നിവാരണ അതോറിറ്റിയുടെ മാര്ഗ നിര്ദേശങ്ങള് കര്ശനമായി പിന്തുടരുക.
The post മഴയും ഇടിമിന്നലും കാറ്റും : ജനങ്ങള് ജാഗ്രത പുലര്ത്തണം appeared first on Pathanamthitta Media.
