തിരുവനന്തപുരം: കേരള പോലീസില് ഇനി ‘വനിതാ’ പോലീസില്ല, പോലീസുകാര് മാത്രം. ഔദ്യോഗിക സ്ഥാനങ്ങള്ക്ക് മുന്നില് വനിതയെന്നു ചേര്ത്ത് അഭിസംബോധന ചെയ്യുന്ന രീതി അവസാനിപ്പിക്കാന് ഡിജിപി ലോക്നാഥ് ബെഹ്റ നിര്ദേശം നല്കി. സേനയില് ലിംഗവിവേചനം അവസാനിപ്പിക്കുന്നതിന്റെ ഭാഗമായാണ് നടപടിയെന്ന് അധികൃതര് പറഞ്ഞു.1995നു ശേഷം സേനയിലെത്തിയ വനിതകള്ക്കാണ് ഇതു ബാധകമാകുന്നത്.
വനിതാ പോലീസില് ഇപ്പോള് രണ്ടു വിഭാഗമാണുള്ളത്. 1995ന് മുന്പു സേനയിലെത്തിയവരും (ക്ലോസ്ഡ് വിങ്), ശേഷമെത്തിയവരും. മുന്പ് വനിതാ പോലീസുകാരെ വനിതാ പോലീസ് കോണ്സ്റ്റബിള്, വനിതാ ഹെഡ് കോണ്സ്റ്റബിള്, വനിതാ എസ്ഐ, വനിതാ സിഐ, വനിതാ ഡിവൈഎസ്പി എന്നിങ്ങനെയാണ് അഭിസംബോധന ചെയ്തിരുന്നത്. 1995 മുതല് വനിതാ പോലീസുകാര് സേനയുടെ മുഖ്യധാരയിലേക്കു വന്നു.
2011ല് വനിതാ പോലീസ് കോണ്സ്റ്റബിളിന്റെ പേര് സിവില് പോലീസ് ഓഫിസറെന്നും വനിതാ ഹെഡ് കോണ്സ്റ്റബിളിന്റെ പേര് സീനിയര് സിവില് പോലീസ് ഓഫിസറെന്നുമാക്കി. ബറ്റാലിയനുകളില് വനിതയെന്ന പദം ഒഴിവാക്കി പോലീസ് കോണ്സ്റ്റബിളും ഹവില്ദാറുമെന്നായി. എന്നാല് വനിതാ പോലീസുകാര് സ്ഥാനപേരിനു മുന്നില് വനിതയെന്ന് ഉപയോഗിക്കുന്നത് തുടര്ന്നു. സഹപ്രവര്ത്തകരും ഇത് ആവര്ത്തിച്ചു. ഇതേത്തുടര്ന്നാണ് ഡിജിപി പുതിയ നിര്ദേശം പുറത്തിറക്കിയത്. ഉത്തരവ് എത്രയും വേഗം കര്ശനമായി നടപ്പിലാക്കണമെന്നാണ് നിര്ദേശം.
