മലപ്പുറം : കാലിലെ മുറിവുമായി ജനവാസകേന്ദ്രങ്ങളില് ഭീതി പരത്തി കഴിഞ്ഞിരുന്ന കാട്ടാന ചെരിഞ്ഞു. പടുക്ക വനത്തിലെ തീക്കടി മതിലിനോട് ചേര്ന്ന് ഞായറാഴ്ച വൈകുന്നേരമാണ് ആനയുടെ ജഡം വനപാലകര് കണ്ടെത്തിയത്. ഇടതുകാലില് വ്രണവുമായി കഴിഞ്ഞിരുന്ന ആനയെ ചികിത്സ നല്കുന്നതിന്റെ ഭാഗമായി ബുധനാഴ്ച വനം വെറ്ററിനറി സര്ജന് സ്ഥലത്തെത്തി നിരീക്ഷിച്ചിരുന്നു.
എന്നാല്, ഇതിനിടെ കഴിഞ്ഞ രണ്ടുദിവസമായി ആനയെ കാണാനില്ലായിരുന്നു. കരുളായി റേഞ്ച് ഓഫിസര് എം.എന്. നജ്മല് അമീനിന്റെ നിര്ദേശത്തെത്തുടര്ന്ന് പടുക്ക ഫോറസ്റ്റ് സ്റ്റേഷനിലെ ജീവനക്കാര് ആനയെ തിരയുന്നതിടെയാണ് തീക്കടിയില് ജഡം കണ്ടെത്തിയത്. രണ്ട് ദിവസത്തെ പഴക്കമുണ്ട്. തിങ്കളാഴ്ച പോസ്റ്റ്മോര്ട്ടം നടപടി പൂര്ത്തീകരിച്ച് ജഡം സംസ്കരിക്കും. ഒരുമാസമായി അമരമ്പലം, കരുളായി, മൂത്തേടം പഞ്ചായത്തുകളിലെ വിവിധ വനാതിര്ത്തി പ്രദേശങ്ങളിലെ ജനവാസകേന്ദ്രങ്ങളില് പകല്പോലും ഭീതിപരത്തി കഴിയുകയായിരുന്നു.
