വണ്ടിപ്പെരിയാര് : വിദേശത്തുനിന്നുമെത്തി ക്വാറന്റീൻ കേന്ദ്രത്തില് കഴിഞ്ഞ യുവാവ് പുറത്തുചാടി. ഇയാള് സഞ്ചരിച്ച ഓട്ടോ ഡ്രൈവറടക്കം മൂന്നുപേര് നിരീക്ഷണത്തിലാണ്. കുവൈത്തില്നിന്ന് എത്തിയ ഉപ്പുതറ സ്വദേശിയായ യുവാവാണ് പുറത്തിറങ്ങി കറങ്ങിനടന്നത്. ചൊവ്വാഴ്ച കുവൈത്തില്നിന്നെത്തിയ ഉപ്പുതറ സ്വദേശിയെ വണ്ടിപ്പെരിയാര് ടൗണിലെ ലോഡ്ജില് ക്വാറന്റീനില് എത്തിച്ചിരുന്നു. വൈകിട്ട് ഇവിടെനിന്ന് പുറത്തുചാടിയ ഇയാള് ഉപ്പുതറയിലെ വീട്ടിലേക്ക് വണ്ടിപ്പെരിയാര് ടൗണില്നിന്ന് ഓട്ടോയില്പോയി. എന്നാല്, ഇയാളെ വീട്ടില് കയറാന് അനുവദിക്കാതെ വീട്ടുകാര് പോലീസില് വിവരം അറിയിക്കുകയായിരുന്നു.
