കല്ലമ്പലം : മുത്താനയിൽ കുളിക്കാൻ ബന്ധുവീട്ടിലെത്തിയ യുവതിയെ കെട്ടിയിട്ട് പീഡിപ്പിക്കാൻ ശ്രമിച്ച കേസിൽ പോലീസ് അന്വേഷണം ഊർജിതം. പ്രതികളെക്കുറിച്ച് വ്യക്തമായ വിവരം ലഭിച്ചുവെന്നാണ് പോലീസ് പറയുന്നത്. പ്രദേശവാസികളായ പ്രതികൾ വലയിലായതായും സൂചനയുണ്ട്. പെൺകുട്ടിയുടെ മൊഴിയും പ്രദേശവാസികളിൽനിന്നുള്ള വിവരത്തിന്റെയും അടിസ്ഥാനത്തിലാണ് പ്രതികളെക്കുറിച്ചുള്ള വിവരങ്ങൾ ലഭ്യമായത്. മൊബൈൽടവർ കേന്ദ്രീകരിച്ചും അന്വേഷണം നടക്കുന്നുണ്ട്.
ഐ.ജി ഹർഷിത അട്ടല്ലൂരിയുടെ മേൽനോട്ടത്തിലാണ് അന്വേഷണം പുരോഗമിക്കുന്നത്. സംഭവം നടന്ന ശനിയാഴ്ച തന്നെ അന്വേഷണത്തിന് വർക്കല ഡിവൈ.എസ്.പി.യുടെ നേതൃത്വത്തിൽ അഞ്ച് ഇൻസ്പെക്ടർമാരെ ഉൾപ്പെടുത്തി പ്രത്യേകം ടീം രൂപവൽകരിച്ചിരുന്നു.
ശനിയാഴ്ച രാവിലെ 10 മണിയോടെ ചെമ്മരുതി മുത്താന ജങ്ഷനു സമീപമാണ് 22 കാരിക്ക് നേരേ അതിക്രമമുണ്ടായത്. കുളിക്കാനും തുണി അലക്കാനുമായി സമീപത്തെ ബന്ധുവീട്ടിൽ എത്തിയതായിരുന്നു യുവതി. വീട്ടിലുള്ളവർ ജോലിക്ക് പോയതിനാൽ മറ്റാരും അവിടെയുണ്ടായിരുന്നില്ല
