അങ്കമാലി : വീട്ടിലെത്തി ദമ്പതികളെ കുത്തി പരുക്കേല്പിച്ച ശേഷം സ്വയം തീകൊളുത്തിയ നിലയില് കണ്ടെത്തിയ യുവാവ് ആശുപത്രിയിലേക്കു കൊണ്ടുപോകും വഴി മരിച്ചു. മുന്നൂര്പ്പിള്ളി മാരേക്കാടന് പരേതനായ ശിവദാസന്റെയും രമണിയുടെയും മകന് നിഷില് (31) ആണ് മരിച്ചത്.
പാലിശേരി താന്നിച്ചിറ കനാല്ബണ്ടിനു സമീപം വാഴക്കാല ഡൈമിസ് (34), ഭാര്യ ഫിഫി (28) എന്നിവര്ക്കാണു കുത്തേറ്റത്. ഫിഫിക്കു കഴുത്തിലും ഡൈമിസിനു വയറ്റിലും കൈകളിലും പുറത്തും കുത്തേറ്റിട്ടുണ്ട്. ഇരുവരും അപകടനില തരണം ചെയ്തു. ദമ്പതികളുടെ വീടിന്റെ ടൈല് ജോലികളുമായി ബന്ധപ്പെട്ട തര്ക്കമാണു കാരണം.
നായയ്ക്കു ചോറു നല്കാനായി പോകവേയാണ് ഫിഫിയെ നിഷില് ആക്രമിച്ചു. ഫിഫി ബഹളം വച്ചു വീടിന്റെ മുന്വശത്തേക്ക് ഓടി. നിഷിലിന്റെ ആക്രമണം തടയുന്നതിനിടെ ഡൈമിസിനും കുത്തേല്ക്കുകയായിരുന്നു.
ബഹളം കേട്ടു നാട്ടുകാര് എത്തുമ്പോള് ദമ്പതിമാര് കുത്തേറ്റ നിലയില് വീടിന്റെ സിറ്റൗട്ടിലും ദേഹത്താകെ തീയുമായി നിഷില് മുറ്റത്തും കിടക്കുന്നതാണു കണ്ടത്.
ദമ്പതികളുടെ വീടിന്റെ ഗൃഹപ്രവേശം നടന്നതു 10 മാസം മുന്പായിരുന്നു. ടൈല് ജോലികള് ചെയ്തതിലെ തര്ക്കവുമായി ബന്ധപ്പെട്ടു നിഷിലിന് എതിരെ പോലീസില് പരാതി നല്കിയിരുന്നു. 30,000 രൂപ കൂടി ലഭിക്കാനുണ്ടെന്നായിരുന്നു നിഷിലിന്റെ വാദം. എന്നാല്, ടൈലിട്ട ഭാഗം അളന്നപ്പോള് അത്രയും നല്കാനില്ലെന്നു ഡൈമിസ് പറഞ്ഞതാണ് പ്രകോപനത്തിന് ഇടയാക്കിയത്.
