കോഴിക്കോട്: ആനക്കാംപൊയില് മുത്തപ്പന്പുഴ തേന്പാറ ഒലിച്ചുചാട്ടത്തില് യുവാവിനെ മരിച്ചനിലയില് കണ്ടെത്തി. കൂടരഞ്ഞി മഞ്ഞക്കടവ് തുവക്കുന്ന് രാജന്-വസന്ത ദമ്പതികളുടെ മകന് രജിന് രാജനെ(19) യാണ് പുഴയില് മരിച്ചനിലയില് കണ്ടെത്തിയത്. ആനക്കാംപൊയിലില് വാഴ തോട്ടത്തില് ജോലി ചെയ്യുന്ന രജിന് രാവിലെ ഏഴുമണിയോടെ ബന്ധുവിനൊപ്പം പുഴയിലെ കുളിക്കടവില് പോയിരുന്നു.
തിരിച്ചു വരാന് വൈകിയതിനെ തുടര്ന്ന് ബന്ധു നടത്തിയ തിരച്ചിലില് കുളിക്കടവിന് സമീപം വെള്ളത്തില് കമിഴ്ന്ന് കിടക്കുന്ന നിലയില് കണ്ടെത്തുകയായിരുന്നു. ഉടന്തന്നെ തിരുവമ്പാടിയിലെ സ്വകാര്യ ആശുപത്രിയില് എത്തിച്ചെങ്കിലും മരിച്ചിരുന്നു. മൃതദേഹം കോഴിക്കോട് മെഡിക്കല് കോളജ് മോര്ച്ചറിയിലേക്കു മാറ്റി.
