കൊച്ചി: ടിടിഇ ആയി ചമഞ്ഞ് മദ്യലഹരിയില് യാത്രക്കാരില് നിന്നു പിഴ ഈടാക്കിയ റെയില്വേ കാറ്ററിങ് ജീവനക്കാരന് പിടിയില്. തിരുവനന്തപുരം ഡിവിഷന് കാറ്ററിങ് സര്വീസിന്റെ ടാഗ് ധരിച്ച് മലബാര് എക്സ്പ്രസില് കയറിയ ഇയാൾ തൃശൂരിനും ആലുവയ്ക്കും ഇടയില് വച്ചായിരുന്നു യാത്രക്കാരില് നിന്ന് പിഴ ഈടാക്കിയത്. ആലുവയില് വച്ച് യഥാര്ഥ ടിടിഇ ഗിരീഷ് കുമാറിന്റെ പിടിയിലായ ഇയാളെ പിന്നീട് പോലീസിനു കൈമാറി. കൊയിലാണ്ടി മൂടാടി സ്വദേശി ഫൈസലിനെയാണ് എറണാകുളം റെയില്വേ പൊലീസ് അറസ്റ്റ് ചെയ്തത്.
ഇയാള്ക്കെതിരെ ആള്മാറാട്ടം, വഞ്ചന തുടങ്ങിയ വിവിധ വകുപ്പുകള് പ്രകാരം കേസ് എടുത്തതായി റെയില്വേ പോലീസ് അറിയിച്ചു. പ്രതി റെയില്വേ കാറ്ററിങ് സര്വീസിലെ ജീവനക്കാരനാണെന്നും റെയില്വേ പൊലീസ് പറഞ്ഞു. സ്ലീപ്പര് കോച്ചില് കയറിയ ഇയാൾ കോച്ചില് ടിടിഇ ആയി ചമഞ്ഞ് യാത്രക്കാരുടെ ടിക്കറ്റ് പരിശോധിച്ചു. റിസര്വേഷന് ടിക്കറ്റില്ലാതെ സ്ലീപ്പര് ക്ലാസില് യാത്ര ചെയ്ത മൂന്നുപേരെ പിടികൂടുകയും ഇവരില് നിന്ന് നൂറ് രൂപ പിഴ ഈടാക്കുകയും ചെയ്തു. രസീത് നല്കുന്നതിന് പകരം അവരുടെ ടിക്കറ്റുകളില് തുക എഴുതി ഒപ്പിട്ട് നല്കുകയായിരുന്നു.
