തിരുവനന്തപുരം : മന്ത്രി ബിന്ദുവിനെതിരെ ലോകായുക്തയില് വീണ്ടും പരാതിയുമായി രമേശ് ചെന്നിത്തല. ലോകായുക്തയുടെ നിലപാട് പരാതിക്കാരനെ അവഹേളിക്കുന്നതാണ്. ഗവര്ണ്ണറുടെ വെളിപ്പെടുത്തല് ഉള്പ്പടെ ഉള്ള കാര്യങ്ങള് പരിഗണിച്ചില്ല. മുഖ്യമന്ത്രിയെ കക്ഷി ചേര്ക്കണമെന്ന തന്റെ വാദവും ലോകായുക്ത അംഗീകരിച്ചില്ലെന്ന് ചെന്നിത്തല പറഞ്ഞു. ഈ സാഹചര്യത്തിലാണ് പുന:പരിശോധന ഹര്ജി.
കണ്ണൂര് വിസി നിയമനത്തില് ഗവര്ണറുടെ പുതിയ വെളിപ്പെടുത്തലുകളുടെ അടിസ്ഥാനത്തില് മന്ത്രി ബിന്ദുവിനെതിരായ പരാതിയില് ഉത്തരവ് പുറപ്പെടുവിക്കുന്നതിന് മുമ്പ് മുഖ്യമന്ത്രിയെ കൂടി പ്രതിപട്ടികയില് ഉള്പ്പെടുത്തണമെന്ന തന്റെ പുതിയ പരാതി ഫയല് ചെയ്തിട്ടും അത് പരിഗണിക്കാന് തയ്യാറാകാതെയാണ് വിധി പ്രഖ്യാപനം നടത്തിയതെന്നും വിധി പ്രഖ്യാപനത്തിനുശേഷം തന്റെ പരാതി കേള്ക്കാമെന്ന ലോകായുക്തയുടെ നിലപാട് പരാതിക്കാരനെ അവഹേളിക്കുന്നതിന് സമാനമാണെന്നും രമേശ് ചെന്നിത്തല പറഞ്ഞു.