ചിറ്റാര് : കുടപ്പനയില് വനപാലകരുടെ കസ്റ്റഡിയിലിരിക്കെ മരണപ്പെട്ട പൊന്നുവിന്റെ കുടുംബത്തിനു നീതി ഉറപ്പാക്കണമെന്നാവശ്യപ്പെട്ട് പത്തനംതിട്ട ജില്ലാ കോണ്ഗ്രസ് കമ്മിറ്റിയുടെ നേതൃത്വത്തില് ചിറ്റാര് ഫോറസ്റ്റ് സ്റ്റേഷന് മുമ്പില് ആരംഭിച്ച അനശ്ചിതകാല റിലേ സത്യാഗ്രഹം അഞ്ചു ദിവസം പിന്നിട്ടു. ജില്ലാ കോണ്ഗ്രസ് കമ്മിറ്റി ഭാരവാഹികളായ വെട്ടൂര് ജ്യോതിപ്രസാദ്, റോബിന് പീറ്റര്, സജി കൊട്ടയ്ക്കാട്, ബ്ലോക്ക് കോണ്ഗ്രസ് കമ്മിറ്റി പ്രസിഡന്റുമാരായ റോയിച്ചന് എഴിക്കകത്ത്, എസ്. സന്തോഷ് കുമാര് എന്നിവരാണ് അഞ്ചാം ദിവസത്തെ സത്യാഗ്രഹത്തില് പങ്കെടുത്തത്.
മണ്ഡലം പ്രസിഡന്റ് ബഷീര് വെള്ളത്തറയില് അദ്ധ്യക്ഷത വഹിച്ച സത്യാഗ്രഹസമരം കെ.പി.സി.സി ജനറല് സെക്രട്ടറി പഴകുളം മധു ഉദ്ഘാടനം ചെയ്തു. സമാപന സമ്മേളനം ഡി.സി.സി പ്രസിഡന്റ് ബാബു ജോര്ജ്ജ് ഉദ്ഘാടനം ചെയ്തു. ഇന്നലെ ജില്ലാ കളക്ടര് വിളിച്ചു ചേര്ത്ത യോഗം വെറും പ്രഹസനമായിരുന്നു എന്നും വനപാലകരും ഗവണ്മെന്റും പറയുന്ന വിശദീകരണം കളക്ടര് ആവര്ത്തിക്കുക മാത്രമാണ് ചെയ്തതെന്നും ബാബു ജോര്ജ്ജ് പറഞ്ഞു. പോലീസ് നടത്തിയ അന്വേഷണത്തില് കണ്ടെത്തിയ വീഴ്ചകള്ക്ക് പോലും നടപടിയെടുക്കാമെന്ന ഉറപ്പ് യോഗത്തില് ഉണ്ടായില്ല. ഭരണാനുകൂല വനപാലക സംഘടനയുടെ സമ്മര്ദ്ദമാണ് ഗവണ്മെന്റിനെ പുറകോട്ട് വലിക്കുന്നതെന്ന ആരോപണം നിലനില്ക്കുന്നു. പ്രതിപക്ഷ നേതാവ് മത്തായിയുടെ കുടുംബത്തെ സന്ദര്ശിച്ച ശേഷം വനംമന്ത്രി, ജില്ലാ പോലീസ് ചീഫ്, ജില്ലാ കളക്ടര് എന്നിവരുമായി ബന്ധപ്പെട്ട് 4 കാര്യങ്ങള് ആവശ്യപ്പെട്ടിരുന്നു. നരഹത്യയ്ക്ക് കേസെടുക്കുക, മറ്റ് പ്രതികളെ സസ്പെന്റ് ചെയ്യുക, കുടുംബത്തിനു നഷ്ടപരിഹാരം നല്കുക, ശവസംസ്കാരം നടത്തുക എന്നീ ന്യായമായ 4 ആവശ്യങ്ങളാണ് ഉന്നയിച്ചത്. ഇതില് ഒന്നിനുപോലും ഇതുവരെ തീരുമാനം ഉണ്ടായില്ല. ഈ സാഹചര്യത്തില് സമരം ശക്തമാക്കുമെന്ന് അദ്ദേഹം അറിയിച്ചു.
ചിറ്റാറില് നടക്കുന്ന റിലേ സമരം തുടരുവാന് കെ.പി.സി.സി അനുവദിച്ചിട്ടുണ്ടെന്നു ബാബു ജോര്ജ്ജ് പറഞ്ഞു. മറ്റ് പാര്ട്ടി പരിപാടികള് റദ്ദു ചെയ്തിട്ടുണ്ട്. നാളെ ഐ.എന്.റ്റി.യു.സി നേതൃത്വത്തിലാണ് സമരം. ഐന്.എന്.റ്റി.യു.സി ജില്ലാ പ്രസിഡന്റ് എ.ഷംസുദ്ദീന് ഉദ്ഘാടനം ചെയ്യും. സമാപന സമ്മേളനത്തില്, വെട്ടൂര് ജ്യോതിപ്രസാദ്, റോബിന് പീറ്റര്, സജി കൊട്ടയ്ക്കാട്, വി.ആര് സോജി, റോയിച്ചന് എഴിക്കകത്ത്, എസ്. സന്തോഷ് കുമാര്, ബഷീര് വെള്ളത്തറ, ജോയല് മാത്യു, അലന് ജിയോ മൈക്കിള് എന്നിവര് പ്രസംഗിച്ചു.
