കൊച്ചി : ലൈംഗികാതിക്രമ കേസില് ആക്ടിവിസ്റ്റ് സിവിക് ചന്ദ്രന് മുന്കൂര് ജാമ്യം അനുവദിച്ച ഉത്തരവില് വിവാദ പരാമര്ശം നടത്തിയ കോഴിക്കോട് ജില്ലാ ജഡ്ജി എസ്.കൃഷ്ണകുമാറിന് സ്ഥലംമാറ്റം. കൊല്ലം ലേബര് കോടതി ജഡ്ജിയായാണ് പുതിയ നിയമനം. ഇദ്ദേഹം ഉള്പ്പെടെ നാല് ജില്ല ജഡ്ജിമാര്ക്ക് സ്ഥലംമാറ്റമുണ്ട്. ഇതു സംബന്ധിച്ച ഹൈകോടതി ഭരണ വിഭാഗത്തിന്റെ ഉത്തരവ് ചൊവ്വാഴ്ച പുറത്തിറങ്ങി. സിവിക് ചന്ദ്രന് മുന്കൂര് ജാമ്യം അനുവദിച്ചുള്ള വിധിയില് കേസിലെ പരാതിക്കാരി പ്രകോപനപരമായ വസ്ത്രം ധരിച്ചെന്ന പരാമര്ശം ഉള്പ്പെടുത്തിയത് ഏറെ വിവാദമായിരുന്നു.
മഞ്ചേരി ജില്ല ജഡ്ജിയായിരുന്ന എസ്.മുരളീകൃഷ്ണനെ കോഴിക്കോട് ജില്ലാ ജഡ്ജിയായും കൊല്ലം ലേബര് കോടതി ജഡ്ജി ഡോ.സി.എസ് മോഹിത്തിനെ എറണാകുളം ലേബര് കോടതി ജഡ്ജിയായും എറണാകുളം അഡീഷനല് ജില്ല ജഡ്ജിയായിരുന്ന സി.പ്രദീപ് കുമാറിനെ മഞ്ചേരി ജില്ലാ ജഡ്ജിയായും നിയമിച്ചു.
